MOSES ELIAS JUARA NULIS BPK RI

BETLEHEM KETAREN, BERASTAGI

Selaku sekalak si tubuh ras sekolah i Taneh Karo Simalem enda, lit kuidah sada ras maun tah e ngenca kekurangenta, e me kebiasan nulis. Tupung aku kuliah, i luar Taneh Karo enda, tergejap kal bangku kekurangen e. Teman-teman si deban enggo terbiasa nulis makalah tah pe artikel, aku je denga mulai. E maka megi berita sekalak si tading i Berastagi (P. Moses Elias Situmorang, OFM Cap) juara nulis, e sada kemegahen kal kuakap, janah min jadi usihen man anak-anak sekolahta tah pe mahasiswa-mahasiswi, bage me  erkusik ibas pusuhku.

Tuhu, sada perbahanen ilakoken Badan Pemeriksa Keuangan Republik Indonesia (BPK RI) ibas njemba pantekna clean goverment dan good governance, terlebih ibas transparansi ras akuntabilitas perbahanen ras tanggungjawap keuangan negara, e me alu tep-tep tahun erbahan lomba tulis  populer ras karya jurnalistik. Lomba karya tulis ibahan alu terbuka kempak umum, pelajar, mahasiswa ras wartawan. Sarat si pentingna e me, karya tulis arus itama ibas sada media cetak (seakatan guna lomba man pelajar).

           

P. Moses Elias Situmorang OFMCap, pastor paroki santo Fransiskus Asisi Berastagai jine ncubaken ngkiuti lomba e alu ermodalken semangat. Adi la icubaken tentu uga pe la banci menang, tapi adi icubaken, je kari maka enggo ieteh, bage atena. Tulisenna si erjudul “BPK RI Benteng Integritas Mencegah dan Memberantas Korupsi” si enggo pernah dimuat ibas harian Sinar Indonesia Baru, tertanggal 31 Januari 2013 terpilih dat juara II.

Kai Kin Isi Tulisenna?

Ibas tulisenna si erjudul “BPK RI Benteng Integritas Mencegah dan Memberantas Korupsi” e, iturikenna maka korupsi i Indonesia enggo mbages kal uratna. “Kai kin kurangna Indonesia enda? Ulih kerangen, ulih perkebunen, ulih laut ras ulih pertambangen kerinana nge simpar ras roncah-oncah. Pemandangen alam si metunggung merari i kerina taneh erdilo ertenah ras ergegeh nambat pusuh erjuta-juta turis manca negara si reh ngembahken duitna teptep musim liburenna. Anem bage, tapi kai si jadi, erjuta-juta kalak Indonesia ibas terpuk kalak musil ras mesera. Utang negara meganjang bagi deleng. Kinata si la arus jadi kinata e, nuduhken kata maka lit si salah ibas pengelolaan keuangen Negara, tah pe negara salah urus.”

“Korupsi enggo rurat ibas kerina tingkaten birokrasi  subuk tingkat si meteruk bage pe ibas tingkat si megangjang. Bagi nina iklan, negerinta la pernah putus hubungen ras korupsi. Berita si erbolo-bolo kerna praktek lipat-ngelipatken sen si ilakoken pejabat-pejabat raduken kalak si erduit, enggo pengir i cuping rayat si rulo. Kas negara la erngadi-ngadi isirup ras ipangani kalak si jahat. Duit si rehna ibas rayat ibas bentuk pajak  ras pengalon si deban la ibagiken rikutken ras arusna, la tepat sasarenna. Ras erkiteken si e, Badan Pemeriksa Keuangan Republik Indonesia (BPK RI) me jadi kubun (benteng) Integritas guna ngambat, nahan ras pengadi rehna korupsi.”, bagen isuratkenna ibas tulisenna e.

“Hukum la ergegeh ras la ngasup erperbahanen kune pemerikaan BPK kerna penggunan sen negara negara la jelas.” Tole pe nina erbahan argumentasi. (Tulisenna bentuk asli sope i-edit buena pitu halamen).

Pengendesen Hadiah

“Aku, ibas gelar BPK RI ngataken selamat man kerina pemenang erbage-bage lomba si enggo ibahan ibas mperingeti HUT ke-67 BPK enda. Mbera-mbera arah erbage-bage perlumban si iban enda, banci peburak semangat kami ibas ndalanken tuga kami i BPK, gia erbage-bage si ngerim-rim.” Bage me nina ketua BPK RI  Hadi Poernomi tupung pengendesen piagam penghargaan kempak kerina pemenang lomba, i Jakarta, tanggal 29 Januari si lewat.

Acara pengendesen hadiah e ilakoken i gedung Auditorium BPK RI, Tower BPK RI lantai 2 Jalan Gatot Subtoto No.31 Jakarta. I Sumatera nari, sada harian terbiten Medan ras e ngenca si terpilih arah tulisen pastor Moses Elias Situmorang OFMCap (nama asli: Elias Situmorang) si itamakenna ibas tanggal 31 Januari 2013 e. Si enda ngataken maka penilen panitia tuhu-tuhu sukap ras teruji nangdangi media si ikuti ras igermeti alu metenget erkelangken team Humas BPK RI ras erpalasken akurasi ras kinirembangtengahen, janah arah e nari me Dewan Juri si tentuna kalak si pentar nentuken si menang. Tergejap kap maka kai nina kuan-kuan: “ntelap gia mata lembing, telapen denga mata pulpen” iakui ras erguna denga seh asa gundari lako korupsi i negeri enda.

Biodatana

Pastor Moses Elias Situmorang e me sekalak anggota ordo Kapusin Propinsi Medan. Tubuh i Lontung, Samosir. Alumni SMP  Budi Mulia Pangururan, SMA Christus Sacerdos Pematang Siantar ras Sekolah Tinggi Filsafat & Teologi Pematang Siantar. Itangkuhken jadi pastor ras jadi pastor muda i Taneh Karo, pernah jadi pastor kepala i Tigabinanga. Pernah magang selaku editor i Kompas-Gramedia Jakarta. Rusur nulis mulai i seminari menengah Pematang Siantar. Melala tulisenna pernah imuat i harian SIB, Analisa ras Kompas bage pe i media Gereja, Mingguan Hidup ras Menjemaat. Mulai Oktober 2013 ertugas jadi pastor paroki St. Fransiskus Asisi Berastagi, Tanah Karo Sumatera Utara. (BK)