PORSENI LISI FASOL CUP 2014, MERIAH

Kabanjahe,Ralinggungi,

         

Porseni Lisi Fasol Cup SMA Katolik Kabanjahe i lakoken ibas wari Kamis, Jumat ras Sabtu tanggal  27,28 Februari ras 1 Maret 2014. Lakon Porseni e i bahan i lebe-lebe sekolah SMA Katolik Jalan Irian Kabanjahe. Sekolah-sekolah si enggo i tenahken panitia si  ikut muat bagin ibas lakon e lit buena sepuluh sekolah, e me  SMP si lit i Taneh Karo enda. Ibas ndalanken lakon enda, leben i bahan panitia piga-piga minggu ope denga i lakoken. Panitia inti si enggo i pilih e me kap: Penanggung jawab Kepala SMA Katolik Kabanjahe: Victori Sebayang S.Pd, Ketua: Heppi Ginting S.Pd, Sekretaris: Lit Ulina br Bangun SE ras Bendahara: Juliana br Maha Amd. Bage pe lit ka piga-piga seksi si ikut muat bagin guna kiniulin lakon e.

      

Tujun lakon enda ibahan e me kap ningkatken prestasi anak sekolah ibas olah raga ras seni bage pe nilahken ibas lakon si la mehuli umpamana narkoba.  Lit telu pertandingen ras perlomban si ni bahan, e me: kap Bola Volli si dilaki, Pidato Bahasa Inggris ras Perlomban Dance. Ibas wari si peteluken Pastor Ignatius Simbolon OFM Cap ngeresmiken lakon Porseni e, alu malu gung. Ibas lakon e, ikut ka pe piga-piga guru ibas sekolah SMP nari  si ikut muat bagin. Lakon i umputi alu hiburen ibas anak sekolah SMA Katolik Kabanjahe ras si ikut erlomba.

     

 Dung kenca perlomban ras pertandingen, maka juri ermomo si jadi juara. Maka si jadi juara ibas lakon e, e me kap:

Ibas perlumban Pidato Bahasa Inggris: Juara 1 : Erwina Kasih Cristhaulina Silalahi (SMP Negeri 1 Kabanjahe); Juara 2: Inka Noprianta br Sinuraya (SMP ST Xaverius 1 Kabanjahe); Juara 3: Cerdas Parasian Sihombing(SMP ST Xaverius 2 Kabanjahe); Juara Harapan 1 : Syaharani (SMP Negeri 2 Kabanjahe).

Ibas Pertandingen Bola Volly Si dilaki: Juara 1 : SMP Masehi Berastagi; Juara 2: SMP Negeri 3 Tigapanah; Juara 3: SMP Methodist Kabanjahe; Juara Harapan 1: SMP ST Xaverius 1 Kabanjahe.

Ibas pertandingen Landek (Dance) Juara 1: SMP Negeri 1 Kabanjahe; Juara 2 : SMP Negeri 3 Tigapanah; Juara 3: SMP ST Xaverius 1 Kabanjahe; Juara Harapan 1 : SMP ST Xaverius 2 Kabanjahe.

 

Dung kenca i momoken juara, maka i bereken hadiah man  pemenang. Iarapken maka ibas tahun si reh erbuena sekolah ikut muat bagin, gelah tambah riahna ras nambahi pemeteh anak sekolah. Lakon itutup alu toto.  

 

H.Ginting/Ralinggungi