MEGAH ATETA JADI KATOLIK

BETLEHEM KETAREN, BERASTAGI

Sue ras Anggaran Dasar Paroki Keuskupan Agung Medan, rapat paripurna arus ilakoken ibas tep-tep tahun. Rapat Paripurna e me kap rapat si meganjang ras si pentingna i paroki, sabap kerina keputusenna jadi keputusen ras-ras, dingen ije me ilapurken kerna kai si enggo terdalanken ibas tahun si lewat ras itetapkan kai si ibahan ibas tahun si erdalan. Rapat Paripurna tahun 2013 Paroki St. Fransiskus Asisi Berastagi, ilakoken ibas tanggal 7 ras 8 Februari si lepus i Samadi Maranatha Berastagi i ikuti 100 kalak, subuk selaku pengurus stasi, pengurus rayon, pengurus paroki, lembaga kategorial bage pe ordo/tarekat si lit i paroki Berastagi.

“Engkai maka megah ateta jadi katolik? Kalak luar pe metehsa maka kita ertutus ate erkiniteken, ertutus ate erdahin. La melala ngerana, la mengayak tersena tapi tetap rusaha erbahan si terulin. Si enda ka me si ikataken penungkunen Presiden maka ia netapken reh dingen erberngi ku Gereja Katolik.”

“Adi siukuri tetap kai dalan ras kite-kitena maka megah ateta jadi katolik, nambah-tambah kap ngenana ateta perpulungenta ras reh nggitna kita erlajar ras erperbahanen nangdangi Gereja. Selaku kalak katolik, kita la terjeng jadi warga lokal, tapi pe jadi warga regional ras pe jadi warga internasional. Adi megermet kam ras pernah kam ku Monas, i ruang museumna lit piagam penghargan man Gereja Katolik. “Indonesia berhutang budi nangdangi pendidiken si isehken Gereja Katolik”, bagem nina tersurat ibas piagam  si itandatangani presiden Soekarno e!”, nina P. Moses ibas kata pengalo-ngalona.

Pastor Ignatius Simbolon, OFM Cap selaku vikaris si ngewakili uskup, ngiahken gelah paripurna enda nggermeti tahun si sangana erdalan e me tahun Martyria. “Mehuli kal adi progam-program ibas tahun enda isemangati tah pe maun ibahan lakon-lakon kerna Martyria!”, nina tupung ia ngerana ibas tegunna. “Tambah-tambah si e, kursus-kursus ras erbage-bage usaha pembinaan umat perlu tetap iperdiateken sabap pertambahanen umat si bilangenna njengangken kita e arus kap itegu-tegu tetap arah nehken pengajaren pe.”, nina ka ngumputi cakapna.

Pastor Emmanuel Sembiring, OFM Cap selaku Propincial Kapusin mabai percakapen ibas terpuk si pemena kerna kai ras uga Biara Kapusin Sapo Malem ras uga ubungan biara e ras paroki. “Kapusin reh ku Sumatera enda ibas tahun 1911 tapi ibas tahun 2006 denga dung erbahan biara Sapo Malem. Kami selaku kapusin seh tahun 1990 tetap erdahin i paroki ras nggejapken maka perlu lit rumah si bagi “oase” i taneh mesawang. Ingan enda terutama man pastor/bruder/frater kapusin tapi ibas terpuk-terpuk tertentu ngaloken kerehen umat tah pe kalak si ertedeh ate nangdangi ingan si sikap guna ndameken pertendin. Kerna kecibalen pastor-pastor si i Jaranguda, banci nge ia ngelai umat, e pe adi lit kejadin si la biasa, umpamana lit alangen pastor si i paroki tah sakit, maka pastor paroki ndilo guna nggancihken dahinna gelah ula lolo.”, nina P. Emmanuel.

Kursus guna Sinegu-negu Asmika, kursus Dirigen ras Kotbah, kursus Kitab Suci ras kursus Litugi, e me keputusen rapat paripurna Berastagi kerna penegun kempak pengurus-pengurus.

Pembangunen gereja i Tanjungbarus, Barusjahe, Stasi Induk, Gurusinga, Doulu Kuta, Semangatgunung, Sukajulu ras Kubucolia si ibas tahun 3013 lolo denga iputusken iterusken ibas tahun enda.

Seakatan si e, tangkas maka pastor paroki si mbaru rusaha pepantek koordinasi ras penegun alu sipaguh-paguhna. E maka iputusken maka kerina pembangunen gereja arus ibenaken ras iarak-arak pastor paroki, kerina keputusen-keputusen i stasi arus leben icakapken ras pastor ras isahken pastor, bage me keputusen ras-ras ibas rapat paripurna e.

Sada si mbaru i paroki Berastagi ibas rapat si sekali enda, maka ibas penutupen rapat paripurna e isehken pe penghargan kempak 5 (lima) stasi si terbaik rikut ras porhanger terbaik. Stasi Sampun (Resta Sembiring), stasi Raya (Set Surbakti), stasi Gurusinga (Sastra Tarigan +), stasi Sada Perarih (Riswan Karo-karo) ras stasi Semangatgunung (Ludovikus Rajin Sinaga) jadi stasi ras porhanger terbaik. Porhanger-porhanger e teridah ermeriah ukur ngaloken piagam pengharhagan si isehken vikep.

Kai kin sarat tahpe pulungen penetapen stasi/porhanger terbaik e? Pastor Moses ngataken si e ibas pemenan pengendesen piagam maka nina: “kesadan arih ibas stasi, kiniliten erbahan lakon/perayan si iarusken, kerajinen nehken adangen stasi ku paroki ras kininggiten stasi e ngikuti pendahin-pendahin paroki!” Bage me ipetangksna kerna pertimbangen-pertimbangen paroki netapken stasi/porhanger terbaik e.(BK)