LA LIT ISTILAH NGADI SEKOLAH

Taneh Karo,Ralinggungi.

 
Presiden RI Susilo Bambang Yudhoyono ras Ibu negara Nyonya Ani Judhoyono bage pe ras rombongenna piga piga menteri bage ka pe petinggi i Sumut  reh ku Kabanjahe Kabupaten Karo Kamis (23/1) guna ngecek langsung kondisi pengongsi erupsi Gunung Sinabung  bage pe ras penanganenna erkiteken  deleng e enggo pultak janah enggo ka  lit 3 bulan lebih dekahna. 

Ibas kesempaten reh ku Taneh Karo, RI 1 mereken bantuan rikutken program-pogram si nilai rupiah na mbuena sada triliun rupiah guna penanganen pengungsi si lit buena 8 ribu lebih kepala keluarga entah pe 29.793 iwa lebih ibas 33 kuta i sekelewat Deleng Sinabung si i tempatken ibas 43 titik lokasi pengungsi termasuk salah sada emkap Paroki St Petrus- Paulus Jln Irian Kabanjahe. 

Erdandanken mbeltukna Deleng Sinabung si langa banci terpredikdi katawari ngadina, rikutken informasi si dat arah Media Center Posko Tanggap Darurat i Kabanjahe ngataken bahasa erbahanca puluhen  rumah penduduk  ceda  janah lebih kurang 10.000 ha perjuman bage pe sinuan-sinuan ikut ka n ge ceda. Asuh-asuhen kerbo entah lembu/kambing pe terpaksa idayaken murah-murah perban lanai lit pren sibanci ibuat man gagaten asuh-asuhen e.Mesui kel akap temen si jadi korban erupsi deleng e. 

E maka nina Susilo Bambang Yudhoyono sanga mereken pengarahen i bas Posko ope lenga ngenen pengungsi i Mesjid Agung Kabanjahe, GBKP Asrma Kodim Kabanjahe ras Paroki St Petrus – Paulus Kabanjahe ngarapken piga piga hal si perlu iperdiateken. 

Ibas kerehen na si pe dua kaliken e  reh ku Kabanjahe ija ibas 2010 si lewat ka pe pernah reh erdandanken peristiwa Deleng Sinabung meletus si seri ka bagi peristiwa 2013 i tegaskenna maka perlu ipikirken relokasi ras rehabilitasi korban meletus na deleng terutama man piga-piga kuta si ndeher kel i baluren deleng e janah kelanjuten sekolah/kuliah anak pengungsi pe perlu itanggulangi termasuk kesehaten. “Tidak ada istilah behernti sekolah /kuliah bagi anak-anak saudara kita akibat korban erupsi Gunung Sinabung” nina.(= anak pengongsi si sekolah/kuliah  la banci ngadi erdandanken erupsi deleng Sinabung). 

La bagi kerehenna ibas 2010 si mbarenda si ermulih, tpi ibas kerehen na si peduakaliken e Prsiden RI ras rombongenna er berngi sada berngi i Kabanjahe janah inganna i kompleks Gereja Katolik Paroki St Petrus-Paulus Jln Irian Kabanjahe tapi teridah nge petugas paspamrpres lit ije ibantu ras petugas keamanan si deban janah lokasi ilengkapi alu CCTV. 

Rombongen i alo-alo Bapa Uskup Agung Medan DR Anicetus B Sinaga Ofm.Cap ras piga-piga pastor termasuk pastor Paroki Jln Irian bage ras petugas Posko janah ope lenga bengket ku bas tenda ruang rapat si enggo ipersiapken Susilo bambang Judhoyono ras Nyonya Ani Judhoyono sempat ka ercakap-cakap man piga – piga pengungsi.

Tanggung Jawab BNPB

Kenca ngaloken data-data bage pe keterangen ras kenca nggo ngidah kondisi  masyarakat si ngongsi bagepe kondisi  Deleng Sinabung, Presiden RI Susilo Bambang Judhoyono mindo gelah kerina instansi terkait baik tingkat menteri, Gubernur Sumatera Utara ras Bupati Karo ngukurken kai-kai saja sini arus ilakoken man kalak singongsi perban erupsi deleng e ntah pe jangka pendek, menengah ras jangka panjangna.

Si enda ituriken SBY bas paksa mereken keterangan pers man wartawan ringan i Paroki St Petrus-Paulus Jln Irian Kabanjahe Jumat (24/1) ope lenga ia ras rombongen na nadingken Kabanjahe janah paksa si e ia itemani piga-piga pejabat emkap MenkoPolhumkam Djoko Suyanto,  Menko Kesra Agung Laksono, Menkes Nafsiah Mboi, Mensesneg Sudi Silalahi,Mendagri Gamawan Fauzi, Menteri ESDM Jero Wacik, Mensos Salim Segaf Al Jufrie, Menteri Pertanian Suswono, Gubernur Sumatera Utara gatot Pujo Nugroho bagepe la ketadingen Bupati Karo DR (HC)Kena Ukur Karo Jambi Surbakti.

Nina presiden, kebijakan-kebijaken si arus idalanken lit piga-piga hal ibas penanganen erupsi deleng Sinabung entah kerna kalak si ngongsi bagepe kai si arusna ibahan erdandanken bencana siterjadi perban erupsi deleng e.

Sipemena  nina presiden emkap gelah min  bantuan man kalak si ngongsi e arus itingkatken amin gia kegiatan aktipitas erupsi deleng e sitik enggo menurun sue ras data-data analisis vulkanologi amin na gia kerna ndigan ngadina erupsi e langa bo lit kepastin na katawari .Sipeduaken ka ikataken kebutuhen man kalak si ngongsi e ibas dua bulan enda nari pe arus isediaken ntah e bantuan logistikna, bantuan kesehaten ras kebutuhen kalak si ngongsi e  seh ku bulan Maret ija irapken erupsi deleng e enggo min ngadi. “Ini semua akan dilaksanakan oleh Badan Nasional Penanggulangan Bencana (BNPB) dengan dukungan Pemkab Karo dan Propinsi Sumatera Utara” nina.( si enda jadi tanggung jawab BPNPB ngaturkenca janah idukung Pemkab Karo bage pe Pemprop Sumatera Utara)

Kerna uga kondisi warga si tading i radius 3 km arah Deleng Sinabung nari, Susilo Bambang Judhoyono mereken solusi gelah warga min nggit i relokasi pemukimenna si irencanaken 15 ha  man lebih kurang 900 kepala keluarga janah inganna i radius 6 – 8 km arah puncak deleng sinabung.  Tapi adi kerna  perjuman banci nge tetap i perjumai  aminna gia deleng e tetapnge status na jadi deleng si lit apina.

Guna si e nina Susilo Bambang Judhoyo nambahisa, si enda nina iperluken waktu  2 – 3 tahun dekahna  segelah erdalan sue ras perencanaan  si terprogram. E maka ngelakokenca si e kerina jadi tugas ras tanggungjawab BNPB si ipimpin Syamsul Ma’arif  ibantu Kasdam I/Bukit Barisan, Kementerian/Lembaga, Gubsu ras Pemkab Karo gelah penanganen erupsi deleng sinabung e banci erdalan mehuli.         Kerna biaya pendidikan anak-anak pengongsi pe tetap nge iprdiateken Susilo Bambang Judhoyono ija nina ibreken nge bea siswa mulai tingkat SD she ku jenjang perguruan tinggi bage nge kerna program Padat Karya pe jadi sada program ka man kepala keluarga janah guna pengelolaan juma , perkebunen ntahpe peternakan ibreken bantuan permodalen alu kredit arah lembaga keuangan nari. 

by  justianus purba.