ENEM I PAROKI BERASTAGI NARI BERKAT TEST SEMINARI

BETLEHEM KETAREN, BERASTAGI

Gia pengumumen pendaf-tarenna kurang tangkas terang (paling lang aku la pernah kubegi imomoken i gereja Stasi Induk Berastagi) tapi kepeken berita kerna Seminari Menengah Christus Sacerdos tahun enda ngaloken siswa mbaru tersena kap ku si belang-belang. Kinata ibas Gereja Katolik kurang bilangen malimna raduken tambah-tambah tetap umatna si rusur isermonken pastor-pastor maun enggo igermeti umat alu sikap ras maun erkiteken si e ia megermet nangdangi paksa pendaftaren e.

Wari Minggu 9/2 si lewat, enem anak mbaru mberkat “anak-anak sintua” itaruhken orangtuana ku paroki guna berkat ku Siantar. Lit pe si enem e e me: Dicky Romero Barus (Stasi Paribun; SMPN 1 Barusjahe; anak Ramlan Barus), Maspin Haganta Ginting (Stasi Barusjahe; SMP 1 Barusjahe; anak Peradaten Ginting),Riski Pratama Sirilus Tarigan (Stasi Sukajulu; SMP 1 Barusjahe; anak Asmed Tarigan), Egya Ridhona Tarigan Tondang (Stasi Raya; SMPN 3 Berastagi; anak Riantonius Tarigan), Agustinus Chistianto Tarigan (Stasi Merdeka; SMP Swasta Masehi; anak Sopianto Tarigan) ras Yoga Makarios Ketaren (Stasi Raya; SMPN 1 Kabanjahe; anak Betlehem Ketaren).

“Sangana sikap peranin parokinta enda, pa. Kuakap enda denga si enteremna ikut test ku Seminari jenda nari!”, nina P. Moses Elias Situmorang. OFM Cap., i kelang-kelang cakapna tupung ia nehken kata penaruh nangdangi si muatna berkat e. 

“La padah taruhken, la padah megogo atendu. Teklah kam enggo sikap kuban kerina. Enda kap kelemahenndu orantua i Taneh Karo enda. Imanja-manjaken je rusur, sitik kari datna si la bagi ukurna mis ia erpenulih kukuta!”, nina ka pastor e erbelas man orangtua si deban. Kenca isiksiki pastor e sada persada ia enemna rikutken berkas-berkasna, minter ka ipilihna sekalak jadi ketua rombongen. “Kam Dicky, kam kubahan jadi ketua, sabap kam ngenca erkacamata!”, nina erbahan cirem pe orangtuana kerina. E maka tandai-tandaindu kerina anggotandu ras aturkenndu. Ise si la nggit ngikutken katandu, ngata kam!”, nina. Kerina ia pe isuruh pastor e sitandan, sisungkun-sungkunen, erteman meriah kerina.

Pastor Leo Joosten Ginting, OFM Cap. Jine ngidah si enem enda ras meteh sura-surana berkat tes ku Siantar langsung ncidahken ukurna erburak. “Hidup paroki Berastagi, hidup katolik! Maju me kita adi enterem denga lit si ersura-sura masuk Seminari!”, nina janahna salam-salam ras mindo gelah ergambar kentisik ras-ras i lebe-lebe rumah Karo ras e lebe-lebe gereja sope berkat. Kai si iban pastor e teridah erlayas. Kenca ergambar ras-ras maka kerina ia minter ersada cakapna. Minggu 9/2 e rembang katikana Minggu Biasa V. 

Erpalasken Berita Simeriah Mat 5: 13-16, P. Agustinus Yew, OFM Cap nuriken kerna Sira ras Terang Doni. Ipetangkas pastor e alu muri ugakin Sira ras uga kin Terang janah eepenurh pe ia gelah kerina si pulung nggit jadi Sira ras Terang Doni. Mbera-mbera ngayulah pertendin kalak enda kerina bage pe pertendian orangtuana nangdangi Kata Tuhan si isehkenna e. (BK).