MINGGU BULUNG-BULUNG, MERIAH

MINGGUBULUNG-BULUNG IRAYAKEN MERIAH I BERASTAGI

BETLEHEM KETAREN

Minggu tanggal 13 April 2014, Gereja Katolik i sebelang-belang dunia ngerayaken Minggu Bulung-bulung. Lit si ngatakensa alu perkatan Minggu Palma lit ka si ngatakensa alu perkatan Palm Day, tapi maksud , tenah ras torosen lakonna bali nge kap.

I Paroki St. Fransiskus Asisi Berastagi jine, lakon e ibenaken i komplek Museum Pusaka Karo samping Pajak Buah Berastagi, ija Bulung-bulung si ipake guna lakon e i pasu-pasu ras ipersingeti mulihi kerna turi-turin perdalanen si perpudi Jesus ku Jerusalem si ialo-alo selaku sekala Raja Simbelin, ialopalop alu bulung-bulung ras erbage-bage uis pe ikimbangken tanda kehamaten ras pengarapen si metunggung dingen mehaga.

Kenca si e eruisken rata-rata ercurak megara petugas liturgi bage pe umat si kurang lebih 1.100 si pulung erdalan siarak-araken, ngincuah ras nangkeng nuju Gereja Inkulturatif Karo si jarakna lit sada batu i Museum e nari. Alu mik idatas pik-up nari Mburak Ginting mabai perpulungen tetap ibas suasana liturgis rende la erngadi-ngadi. Lagu “Ersura-surak Jerusalem” mabai perpulungen e teridah tanggas nggermeti suasana ermegah ate, semangat ras erpengarapen nangdangi Raja si bengket ku kotaNa.

Kenca Berita Simeriah si gedang iogeken Efendi Sembiring, Budiman Kaban, Tangsi Barus ras pitu temanna si deban alu pegancih-gancihen  P. Agustinus ngerana nehken Tenah Lakon.

“Lakon si ilakoken kita senda e me saca upacara si istimewa, metunggung dingen mehaga sabap enterem ras alu den kedamen kita erdalan ras-ras, ngingetken perdalanen Jesus bengket ku Jerusalem ndube!”, nina P. Agustinu Yew, OFM Cap ibas ia menaken kotbahna.

“Labo biasa Jesus nggit ialop-alop tah pe ipeganjang alu puji-pujin. Tupung Petrus dan ajar-ajar si deban jengang ras lanai tehna ngerana nare kemulian si icidahken Jesus i deleng Tabor  ras Petrus ersura-sura erbahan telu Sapo guna Jesus, Elia ras Musa, Jesus la nggit alu nina:”Ula kata-kataken kerina si idahndu sendah sope seh paksana!”, nina ka pastor e nerusken cakapna.

“Bage ka me pe jadi tupung tupung Jesus mere man lima ribu kalak e. Kenca kalak e kerina besur, ras atena gelah tetap ia lanai susah ncari makan, ersura ia kerina ngakat Jesus jadi Raja, tapi Jesus la nggit megiken sura-sura jelma si enterem e!” nina ka P. Agustinus.

“Tapi ibas wari si irayaken kita sendah, ija ndube pulung kurang lebih 2.500.000 kalak kalak Jahudi, tupung lit buena pe 2.500 asuh-asuhen i persembaheken, i je ka me ia petangkasken diriNa si perpudi alu nina: Aku Mesias, Anak Dibata! ras pediat jelma si enterem nge ngalop-ngalop ia alu dem keriahen, ketunggungen ras kinihagan.”

“Paksa si uga kin si jadi e paksana? E me kap paksa ketangkasen si sedekah enda terbuni ibas sada rusia si mbelin. Paksa si reh ras jadi e ija Jesus ipeganjang alu ia ipersilangken i ingan si tuhu-tuhu meganjang, e me Deleng Golgota!”, nina ka pastor Agustinus nerusken cakapna.

“Situhuna, labo perlu keri darehNa iamburkenna, sentaktak darehna pe cukup nelamatken kerina jelma si erdosa, tapi Jesus jine la nggit tanggung-tanggung, bage me penggermeten si isehken Thomas Aquinas! Maksud Thomas, kita pe la perlu rahan-ahan ibas nehken pengurbanen, ngendesken diri guna keselamatenta ras kemalemen ate jelma si enterem”, nina ka pastor e.

Umat si pulung dem ibas Gereja Inkulturatif Karo e teridah tertip, ergiah-giah ras ermalem ate megiken cakap si ipeseh P. Agustinus si bagi biasana kotbah alu ndeheri umat ras ngerana alu tata gerak si erdaulat e.

Si Perlu i Cakapken tah pe Ipesikap Ku Pudi Wari

Bagi semalna kita erbahan kerja adat, biasa jadi maka kenca enggo dung dahin e maka enggo ka teridah ijah-ije si man pesikapen ku pudi wari. Bage me pe kerna perayan Minggu Bulung-bulung enda.

Sipemena, engkai maka ibas peraraken ibahan sekalak Mudika ngersak Kuda? Ma kin arusna Pemimpin Lakon si nelakoken peran Jesus nge si arusna ngersak?

Sipeduaken, engkai maka Kuda si si ersak? Situhuna ibas Ralinggungi edisi April enggo ipetangkas Hendri Sitepu maka rikutken adat kalak Jahudi, adi pemimpin reh ngersak kuda e tanda bahaya, tanda lit kebiaren si mesangat. Tapi pemimpin ngersak Kalde tanda Raja reh maba berita dame.

Sipeteuken, engkai maka sipake “bulung-bulung” kerangen tah pe Sikas ibas lakon e? Ibas kalak Karo lit kap bedana “Bulung-bulug” tah “Peren-peren”. Adi Bulung-bulung e me asakai si turah i juma tah kesain tah i kerangen si erguna subuk man perkakas, balut pangan tah pe tambar. Seakatan si e ikataken Peren-peren. Tentu la mehuli adi sigejap perayan e perayan Minggu Peren-peren. (BK).