REUNI SEKOLAH PORHANGER MBARU-MBARU ENDA I SIANTAR

                                                              Mbaru-mbaru enda, tepatna ibas wari Minggu (30/3) seh ku wari Selasa (1/4) Telu Komisi KAM (Komkat, Komlit ras KKS)  erbahan reuni STPP-Sekolah Porhanger, e me reuni  si peteluken nangdangi angkaten si pemena ras si ipersada ras reuni si peduaken kempak angkaten si peduaken sekolah e. 

Reuni si ibahan i rumah retreat St. Vincensius Siantar e, ertemaken “Nggeluh Metunggung, Isenangi Kalak” ibahan guna nambahi pemeteh (Bina Lanjut) alumni sekolah porhanger dingen ngorati kerna kai-kai saja si enggo ibahan alumni e subuk i lingkungen, stasi bage pe i paroki sekalak-sekalak.

Asa sipengidah kami, lit 8 kalak i paroki Tigabinanga nari; 6 kalak i paroki SPP Kabanjahe; 4 kalak i paroki SPM Kabanjahe; 4 kalak ka i paroki Lau Baleng; 3 kalak i paroki Parsoburan; 6 kalak i paroki Balige nari; 2 kalak i paroki Pangururan; 3 kalak i paroki Tomok; 3 kalak i paroki Toganderket ras 7 kalak kami i paroki Berastagi nari, ermeriah ukur jumpa ras teman-teman ras ertutus ate ngikuti kerina terpuk-terpuk perjumpan e. 

Kenca ibabaina kerina sipulung ibas Lakon Pertoton Pembukan, pastor Octavianus Situngkir, OFMCap, nehken pengalo-ngalon alu ngataken maka reuni e ilakoken guna ngingetken maka alumni Sekolah Porhanger enggo iajari sedekah telu tahun gelah lebih nggabbal subuk ibas pemeteh bage pe ibas pertendin. “Rikutken ras Martiria jadi tema tahun enda ibas keuskupenta, maka perjumpanta si telu wari enda pe iaturken gelah ras-ras kita erkaca dingen erlajar gelah ibas pengelainta ras ibas kegelugenta si teptep wari, tambah-tambah ulina kita ras-tambah-tambah ka ate kalak ngena kempak kita!” nina, P. Oktav.

Ibas wari Senin, wari sipeduaken perjumpan e, ibas terpuk-terpukna alumni isuruh nuriken kai-kai saja si enggo ibahan tamaten Sekolah Porhanger subuk i lingkungen, i stasi bage pe i paroki. Rata-rata alumni e ngataken maka ia muat bagin ibas pendahin-pendahin i kelompok basis e. 

“Aku rusur nggantiken tugas pengurus si deban si enggo gia itentuken tugasna tapi nteh engkai la ia reh. E maka aku tetap ersikap-ersikap. Ulihku  koordinator posko ibas kami ngungsi. Labo gelar pengurus si tuhu-tuhu man perayaken, tapi uga dahin Gereja banci erlayas!”, nina Budiman Sembiring nuriken pengalamenna, janah katana e iueken kerina anggota kelompokna, janah kepentaren si bage rupana si lit ibas teptep kelompok iaangkap ras ikuhi P. Oktav ibas baginna nuriken kerna Nggeluh si Metunggung Gelah Isenangi Kalak.

Pastor Sirilius Manalu OFMCap ibas penegunna, rusaha pegegehi semangat juang alumni ibas pengelaina sekalak-sekalak. “Ibas kegeluhennta bage pe pendahin pengelainta, la banci lang si jumpai pengalamen si mehuli ras pe si mesui. Lit si entebu lit ka si erbahan pegih siakap. Kecewa me kita adi ngarap kita enterem si muji ras si ngergai kita ibas kiniulin si isehken kita. Tapi nehenlah uga sinuan-sinuan turah mehumur ibas sampah-sampah. Peminpin tetap nge reh ibas kegeluhen si dem kiniseran ras erbage-bage perbeben ija ia ipebelin-belin!”, nina P. Sirilius.

Lakon i bas wari si perpudi, iisi alu rekoleksi  si itegu-tegu P. Piorensius Sipayung, OFMcap. Rekoleksi e lit ibas telu terpuk, e me: Konferensi I; Konferensi II ras Perayan Ekaristi. Ibas Konferensi I, P. Piorensius menaken perjumpaan alu ngingetken uga pentingna pengurus awam muat bagin ibas kegeluhen Gereja i KAM.

“Peridin, Penuruhen Jesus man ajar-ajarna, Lima Palas Kegeluhen Gereja ras kinata kurangna pengurus si tertahbis, e me palas pengelebuh nangdangi pengurus awam. Pengurus awam ilebuh ras ijadiken missionaris guna ngelai i bas perpulungen”, nina pastor e.

Ibas Konferensi II, alumni itegu-tegu guna pebagesi penggejapen kerna uga pengurus gereja sekalu miisionaris. “Pang ncidahken kiniteken i lebe-lebe jelma si enterem; tutus ate ras rela ngaloken kiniseran ibas perjuangen dingen; rusaha nggeluh badia”, emkap siarus igelem alu paguh.

“Gelah erbuah pendahin missonaris, arus kap kita pang ersaksi; pang ngataken ketuhu-tuhun; mesikel sisampat-sampaten; mesikel pebelinken kiniersadan; siela-elan; nggit megiken cakap teman; lit gegeh pesikapken; lit perayaken jadi usihen; mesikel arih-arih; ras mesikel petunggungken ras pehagaken budaya si erkekelengen”, nina pastor e ngumputi cakapna.

Sipulung ibas reuni enda teridah ermeriah ukur ras mburo atena tedeh. Marhen Ginting bage Edison Pelawi si gia rembang lit dahinna picet tupung si e, rusaha reh ras muat bagin ibas kepulungen e.

“Rugi kal adi la reh, seakatan jumpa ras teman-teman, mulihi ka kita iingetken ras itambari arah lakon-lakon perjumpan reuni enda”, nina Porhanger i Suka nari e ras cakapna e iueken Pelawi mergana i Batukarang nari. Reuni tahun si reh irencanaken i bahan ibas tanggal 22 seh ku 24 Maret i Nagahuta Siantar.(BK).