REUNI SEKOLAH PORHANGER MBARU-MBARU ENDA I SIANTAR

                                                              Mbaru-mbaru enda, tepatna ibas wari Minggu (30/3) seh ku wari Selasa (1/4) Telu Komisi KAM (Komkat, Komlit ras KKS)  erbahan reuni STPP-Sekolah Porhanger, e me reuni  si peteluken nangdangi angkaten si pemena ras si ipersada ras reuni si peduaken kempak angkaten si peduaken sekolah e. 

Reuni si ibahan i rumah retreat St. Vincensius Siantar e, ertemaken “Nggeluh Metunggung, Isenangi Kalak” ibahan guna nambahi pemeteh (Bina Lanjut) alumni sekolah porhanger dingen ngorati kerna kai-kai saja si enggo ibahan alumni e subuk i lingkungen, stasi bage pe i paroki sekalak-sekalak.

Asa sipengidah kami, lit 8 kalak i paroki Tigabinanga nari; 6 kalak i paroki SPP Kabanjahe; 4 kalak i paroki SPM Kabanjahe; 4 kalak ka i paroki Lau Baleng; 3 kalak i paroki Parsoburan; 6 kalak i paroki Balige nari; 2 kalak i paroki Pangururan; 3 kalak i paroki Tomok; 3 kalak i paroki Toganderket ras 7 kalak kami i paroki Berastagi nari, ermeriah ukur jumpa ras teman-teman ras ertutus ate ngikuti kerina terpuk-terpuk perjumpan e. 

Kenca ibabaina kerina sipulung ibas Lakon Pertoton Pembukan, pastor Octavianus Situngkir, OFMCap, nehken pengalo-ngalon alu ngataken maka reuni e ilakoken guna ngingetken maka alumni Sekolah Porhanger enggo iajari sedekah telu tahun gelah lebih nggabbal subuk ibas pemeteh bage pe ibas pertendin. “Rikutken ras Martiria jadi tema tahun enda ibas keuskupenta, maka perjumpanta si telu wari enda pe iaturken gelah ras-ras kita erkaca dingen erlajar gelah ibas pengelainta ras ibas kegelugenta si teptep wari, tambah-tambah ulina kita ras-tambah-tambah ka ate kalak ngena kempak kita!” nina, P. Oktav.

Ibas wari Senin, wari sipeduaken perjumpan e, ibas terpuk-terpukna alumni isuruh nuriken kai-kai saja si enggo ibahan tamaten Sekolah Porhanger subuk i lingkungen, i stasi bage pe i paroki. Rata-rata alumni e ngataken maka ia muat bagin ibas pendahin-pendahin i kelompok basis e. 

“Aku rusur nggantiken tugas pengurus si deban si enggo gia itentuken tugasna tapi nteh engkai la ia reh. E maka aku tetap ersikap-ersikap. Ulihku  koordinator posko ibas kami ngungsi. Labo gelar pengurus si tuhu-tuhu man perayaken, tapi uga dahin Gereja banci erlayas!”, nina Budiman Sembiring nuriken pengalamenna, janah katana e iueken kerina anggota kelompokna, janah kepentaren si bage rupana si lit ibas teptep kelompok iaangkap ras ikuhi P. Oktav ibas baginna nuriken kerna Nggeluh si Metunggung Gelah Isenangi Kalak.

Pastor Sirilius Manalu OFMCap ibas penegunna, rusaha pegegehi semangat juang alumni ibas pengelaina sekalak-sekalak. “Ibas kegeluhennta bage pe pendahin pengelainta, la banci lang si jumpai pengalamen si mehuli ras pe si mesui. Lit si entebu lit ka si erbahan pegih siakap. Kecewa me kita adi ngarap kita enterem si muji ras si ngergai kita ibas kiniulin si isehken kita. Tapi nehenlah uga sinuan-sinuan turah mehumur ibas sampah-sampah. Peminpin tetap nge reh ibas kegeluhen si dem kiniseran ras erbage-bage perbeben ija ia ipebelin-belin!”, nina P. Sirilius.

Lakon i bas wari si perpudi, iisi alu rekoleksi  si itegu-tegu P. Piorensius Sipayung, OFMcap. Rekoleksi e lit ibas telu terpuk, e me: Konferensi I; Konferensi II ras Perayan Ekaristi. Ibas Konferensi I, P. Piorensius menaken perjumpaan alu ngingetken uga pentingna pengurus awam muat bagin ibas kegeluhen Gereja i KAM.

“Peridin, Penuruhen Jesus man ajar-ajarna, Lima Palas Kegeluhen Gereja ras kinata kurangna pengurus si tertahbis, e me palas pengelebuh nangdangi pengurus awam. Pengurus awam ilebuh ras ijadiken missionaris guna ngelai i bas perpulungen”, nina pastor e.

Ibas Konferensi II, alumni itegu-tegu guna pebagesi penggejapen kerna uga pengurus gereja sekalu miisionaris. “Pang ncidahken kiniteken i lebe-lebe jelma si enterem; tutus ate ras rela ngaloken kiniseran ibas perjuangen dingen; rusaha nggeluh badia”, emkap siarus igelem alu paguh.

“Gelah erbuah pendahin missonaris, arus kap kita pang ersaksi; pang ngataken ketuhu-tuhun; mesikel sisampat-sampaten; mesikel pebelinken kiniersadan; siela-elan; nggit megiken cakap teman; lit gegeh pesikapken; lit perayaken jadi usihen; mesikel arih-arih; ras mesikel petunggungken ras pehagaken budaya si erkekelengen”, nina pastor e ngumputi cakapna.

Sipulung ibas reuni enda teridah ermeriah ukur ras mburo atena tedeh. Marhen Ginting bage Edison Pelawi si gia rembang lit dahinna picet tupung si e, rusaha reh ras muat bagin ibas kepulungen e.

“Rugi kal adi la reh, seakatan jumpa ras teman-teman, mulihi ka kita iingetken ras itambari arah lakon-lakon perjumpan reuni enda”, nina Porhanger i Suka nari e ras cakapna e iueken Pelawi mergana i Batukarang nari. Reuni tahun si reh irencanaken i bahan ibas tanggal 22 seh ku 24 Maret i Nagahuta Siantar.(BK).

SMA KATOLIK 1 KABANJAHE JUARA UMUM IBAS PERLUMBAN OLYMPIADE UNIVERSITAS QUALITY

Kabanjahe,Ralinggungi.

      

Ibas lakon perlomban  ras pertandingen Olympiade Sains ras olah raga si nilakoken Universitas Quality mbaru-mbaru enda, SMA Katolik Kabanjahe ndat Juara umum. Lakon e e ibenaken ibas bulan Nopember 2013 . Enggo kenca reh surat undangen ibas panitia nari, maka ibahan persikapen lako ngikuti perlomban ras pertandingen e. Lit piga-piga Guru milihi murid si jadi ikut muat bagin.E maka ibahan piga-piga kali latihen, gelah sue ras bagi si niarapken ulihna.

      

Ibas lakon pendungi ibahan ibas wari senin, tanggal 31 Maret i Kampus Universitas Quality Lau Gumba Berastagi. Amina gia reh udan ibas lakon e, tapi enda la erbahan surut semangat anak sekolah si ngikutisa. Ibas lakon e, SMA Katolik 1 Kabanjahe jadi Juara Umum, erkiteken si mbuena ndat tropi si ni sikapken panitia. Enggo kenca dung perlomban ras pertandingen ,emaka panitia ermomo ras mereken hadiah si jadi Juara.

      

Lakon  perlomban ras pertandingen si jadi juara si ni dat SMA Katolik e me kap Olympiade Ekonomi, Juara 1 : Anastasia Marlina br Sembiring Milala; Juara 2 : Puja Kristi br Sembiring. Ibas perlumban Olympiade Matematika, Juara 1 : Angga Giovani Bukit, Juara 2 : Hotriana br Manik; Juara 3 :  Roviranti br Tarigan.Ibas pertandingen Sepak Bola Mini (si dilaki) dat Juara 1 SMA Katolik e, ibas pertandingen Bola Volly si dilakidat Juara 2. Bage pe ibas Bola Volly si diberu dat Juara 1, janah ibas pertandingen Majalah dinding dat Juara 3.

Lit siwah buena tropy si lit i dat SMA Katolik Kabanjahe, enda tentuna jadi sada prestasi si mehuli si erbahan SMA Katolik jadi salah sada SMA si mejile i Taneh Karo enda. Guru si nemani murid ibas lakon e, e me kap : Heppi Ginting S.Pd, Bisma Ginting S.Pd, Gisatra Ginting S.Pd ras Ika Natalia br Sitepu SS. Mbera-mbera arah lakon enda banci ningkatken prestasi man Sekolah  SMA Katolik bage ka pe Universitas Quality reh majuna janah  jadi Universitas kebanggaan i Taneh Karo enda. 
(Bp Sulngam Ginting)

MOSES ELIAS JUARA NULIS BPK RI

BETLEHEM KETAREN, BERASTAGI

Selaku sekalak si tubuh ras sekolah i Taneh Karo Simalem enda, lit kuidah sada ras maun tah e ngenca kekurangenta, e me kebiasan nulis. Tupung aku kuliah, i luar Taneh Karo enda, tergejap kal bangku kekurangen e. Teman-teman si deban enggo terbiasa nulis makalah tah pe artikel, aku je denga mulai. E maka megi berita sekalak si tading i Berastagi (P. Moses Elias Situmorang, OFM Cap) juara nulis, e sada kemegahen kal kuakap, janah min jadi usihen man anak-anak sekolahta tah pe mahasiswa-mahasiswi, bage me  erkusik ibas pusuhku.

Tuhu, sada perbahanen ilakoken Badan Pemeriksa Keuangan Republik Indonesia (BPK RI) ibas njemba pantekna clean goverment dan good governance, terlebih ibas transparansi ras akuntabilitas perbahanen ras tanggungjawap keuangan negara, e me alu tep-tep tahun erbahan lomba tulis  populer ras karya jurnalistik. Lomba karya tulis ibahan alu terbuka kempak umum, pelajar, mahasiswa ras wartawan. Sarat si pentingna e me, karya tulis arus itama ibas sada media cetak (seakatan guna lomba man pelajar).

           

P. Moses Elias Situmorang OFMCap, pastor paroki santo Fransiskus Asisi Berastagai jine ncubaken ngkiuti lomba e alu ermodalken semangat. Adi la icubaken tentu uga pe la banci menang, tapi adi icubaken, je kari maka enggo ieteh, bage atena. Tulisenna si erjudul “BPK RI Benteng Integritas Mencegah dan Memberantas Korupsi” si enggo pernah dimuat ibas harian Sinar Indonesia Baru, tertanggal 31 Januari 2013 terpilih dat juara II.

Kai Kin Isi Tulisenna?

Ibas tulisenna si erjudul “BPK RI Benteng Integritas Mencegah dan Memberantas Korupsi” e, iturikenna maka korupsi i Indonesia enggo mbages kal uratna. “Kai kin kurangna Indonesia enda? Ulih kerangen, ulih perkebunen, ulih laut ras ulih pertambangen kerinana nge simpar ras roncah-oncah. Pemandangen alam si metunggung merari i kerina taneh erdilo ertenah ras ergegeh nambat pusuh erjuta-juta turis manca negara si reh ngembahken duitna teptep musim liburenna. Anem bage, tapi kai si jadi, erjuta-juta kalak Indonesia ibas terpuk kalak musil ras mesera. Utang negara meganjang bagi deleng. Kinata si la arus jadi kinata e, nuduhken kata maka lit si salah ibas pengelolaan keuangen Negara, tah pe negara salah urus.”

“Korupsi enggo rurat ibas kerina tingkaten birokrasi  subuk tingkat si meteruk bage pe ibas tingkat si megangjang. Bagi nina iklan, negerinta la pernah putus hubungen ras korupsi. Berita si erbolo-bolo kerna praktek lipat-ngelipatken sen si ilakoken pejabat-pejabat raduken kalak si erduit, enggo pengir i cuping rayat si rulo. Kas negara la erngadi-ngadi isirup ras ipangani kalak si jahat. Duit si rehna ibas rayat ibas bentuk pajak  ras pengalon si deban la ibagiken rikutken ras arusna, la tepat sasarenna. Ras erkiteken si e, Badan Pemeriksa Keuangan Republik Indonesia (BPK RI) me jadi kubun (benteng) Integritas guna ngambat, nahan ras pengadi rehna korupsi.”, bagen isuratkenna ibas tulisenna e.

“Hukum la ergegeh ras la ngasup erperbahanen kune pemerikaan BPK kerna penggunan sen negara negara la jelas.” Tole pe nina erbahan argumentasi. (Tulisenna bentuk asli sope i-edit buena pitu halamen).

Pengendesen Hadiah

“Aku, ibas gelar BPK RI ngataken selamat man kerina pemenang erbage-bage lomba si enggo ibahan ibas mperingeti HUT ke-67 BPK enda. Mbera-mbera arah erbage-bage perlumban si iban enda, banci peburak semangat kami ibas ndalanken tuga kami i BPK, gia erbage-bage si ngerim-rim.” Bage me nina ketua BPK RI  Hadi Poernomi tupung pengendesen piagam penghargaan kempak kerina pemenang lomba, i Jakarta, tanggal 29 Januari si lewat.

Acara pengendesen hadiah e ilakoken i gedung Auditorium BPK RI, Tower BPK RI lantai 2 Jalan Gatot Subtoto No.31 Jakarta. I Sumatera nari, sada harian terbiten Medan ras e ngenca si terpilih arah tulisen pastor Moses Elias Situmorang OFMCap (nama asli: Elias Situmorang) si itamakenna ibas tanggal 31 Januari 2013 e. Si enda ngataken maka penilen panitia tuhu-tuhu sukap ras teruji nangdangi media si ikuti ras igermeti alu metenget erkelangken team Humas BPK RI ras erpalasken akurasi ras kinirembangtengahen, janah arah e nari me Dewan Juri si tentuna kalak si pentar nentuken si menang. Tergejap kap maka kai nina kuan-kuan: “ntelap gia mata lembing, telapen denga mata pulpen” iakui ras erguna denga seh asa gundari lako korupsi i negeri enda.

Biodatana

Pastor Moses Elias Situmorang e me sekalak anggota ordo Kapusin Propinsi Medan. Tubuh i Lontung, Samosir. Alumni SMP  Budi Mulia Pangururan, SMA Christus Sacerdos Pematang Siantar ras Sekolah Tinggi Filsafat & Teologi Pematang Siantar. Itangkuhken jadi pastor ras jadi pastor muda i Taneh Karo, pernah jadi pastor kepala i Tigabinanga. Pernah magang selaku editor i Kompas-Gramedia Jakarta. Rusur nulis mulai i seminari menengah Pematang Siantar. Melala tulisenna pernah imuat i harian SIB, Analisa ras Kompas bage pe i media Gereja, Mingguan Hidup ras Menjemaat. Mulai Oktober 2013 ertugas jadi pastor paroki St. Fransiskus Asisi Berastagi, Tanah Karo Sumatera Utara. (BK)

SEMINAR 

“GEREJA KATOLIK I TANEH KARO GENDUARI ENDA” 

ERDALAN ALU ERLAYAS

BETLEHEM KETAREN, BERASTAGI

Seminar kerna uga kin taktak cibal Gereja Katolik paksa si genduari enda, sada bagin lakon segedang sada tahun perayan Jubileum 75 Tahun Gereja Katolik i Taneh Karo Simalem, ilakoken segedang sada wari i Samadi Maranatha, ibas wari Sabtu 22/3.

Seminar si ibahan lako nggermeti ulih penggermeten P. Dr. Herman Nainggolan, OFMCap ras aronna kerna perdalanen 75 Gereja Katolik i Taneh Karo e, erdalan alu erlayas, ibas pengelayasi  P. Moses Elias Sitomorang (panelis) ras bandingen si ibabai Pdt. Masada Sinukaban, M.Si (GBKP), P. Emmanuel Sem-biring, OFM Cap, Antoni Bangun ras Drs. Sung Karo-karo.

Uskup A.B. Sinaga, OFM Cap ibas mbuka seminar nuriken kerna Misi Evangelisasi rikutken Konsili Vatikan II. “Perlu kal sigargari mulihi kerna ketangkasen  penjelman rikutken St. Justinus Martir kerna Verbum caro factum est (Kata jadi jelma) ibas dua cara pengenehen, e me logos personalis: Jesus jadi jelma selaku sarat penentu keselamaten ras logos spermatikos: benih-benih Kata Dibata ringan ibas ketunggungen adat budaya manusia. Si dua enda min mabai kita pentar, bagi si enggo icidahken misionaris-misinaris. Bagi ibas benana nari Gereja Katolik reh la pernah lako masapken adat karo tapi ngkuhisa gelah metunggung i lebe-lebe manusia terlebih ilebe-lebe Dibata”, nina uskup e.

P. Dr. Herman Nainggolan, OFM Cap jine mabai cakapna kerna tak-tak cibal Gereja Katolik genduari enda rikutken ras kurang lebih 38 “curmin” si ipakena ibas penelitina rikutken penungkunen-penungkunen nangdangi 400 kalak si ijadikenna “batu uji”. “Pengurus ras Umat kurang aktif, Ekonomi lemah, sarana ras prasarana cukup ras pemeteh kerna kekatoliken kurang denga”, nina kerna ulih penggermetenna e.

Pdt. Masada, M.Si jine ngidah maka kai si lit ibas Gereja Katolik genduari enda pas ka nge bagi si paksana jadi i GBKP. Kerehen umat ku gereja kurang, umat erpengakap maka lakon bage-bage saja. “Adi ningku, sumpama ibahan i Gereja Katolik enda sada pastor ngepkep sada stasi, tentu reh sikapna. Sabap adi enteremsa kepkepen sukar nge nandaisa, piah lanai terpermakani. Tambah-tamah si e perlu ka nge kita erlajar kiniulin-kiniulin kai kin si lit ibas ingan kuja umatta rusur kiam!”, nina pendeta e.

P. Emmanuel Sembiring, OFM Cap ngatataken katana alu nina: “Liturgi sada lakon si penting ibas pepantek kegeluhen Gereja, sabap liturgi me si idahi si enteremna jelma ras ibas litugi e ipebindangken kerina ajaren Gereja”.

Antoni Bangun ngingetken maka Gereja Katolik perlu nggiahken pengelai pengurus awam ras ngajuk maka permakan-permakan pe perlu ka nge tetap “erkaca” guna tetap nehken pemere diri si terulin man umat ibas pengelanna. La ketadingen, Drs. Suang Karo-karo ngataken maka Gereja mehuli kal adi erbahan ubungen si sikap ras pemerintahen janah ngaturken diri gelah tetap ka merim i negara enda bagi si enggo-enggona alu giat ndalanken komunikasi bage pe giat pesikap diri gelah banci muat bagin ibas persaturen politik subuk i badan ekskutif bage pe i badan legislatif ras judikatif.

      P. Ignatius Simbolon, OFM Cap menai seminar e alu lakon pertoton si gendek. “Seakatan patut kita erkata bujur man Dibata ibas pemerena si mbelin enggo 75 tahun Gereja Katolik i Taneh Karo Simalem, erbuah meramis ibas taneh si mehumur, ibas wari si sendah patut pe kita ercurmin kerna uga kin ayo Gerejanta genduari paksa. Em tujun kita pulung ras-ras rikutken ras bapa-bapanta si maba cakap enggo sitenahken kita!”, nina ibas ia nuri-nuri.
      
     Sipulung si 141 kalak e (rikutken daftar si reh) subuk i paroki St. Fransiskus Asisi Tigabinanga, Berastagi bage pe St. Petrus Paulus ras St. Perawan Maria Diangkat Ke Kurga, tangkas ertutus ate nggemeti seminar enda ras nehken penungkunen bage pe usulen-usulen. (BK).

MEGAH ATETA JADI KATOLIK

BETLEHEM KETAREN, BERASTAGI

Sue ras Anggaran Dasar Paroki Keuskupan Agung Medan, rapat paripurna arus ilakoken ibas tep-tep tahun. Rapat Paripurna e me kap rapat si meganjang ras si pentingna i paroki, sabap kerina keputusenna jadi keputusen ras-ras, dingen ije me ilapurken kerna kai si enggo terdalanken ibas tahun si lewat ras itetapkan kai si ibahan ibas tahun si erdalan. Rapat Paripurna tahun 2013 Paroki St. Fransiskus Asisi Berastagi, ilakoken ibas tanggal 7 ras 8 Februari si lepus i Samadi Maranatha Berastagi i ikuti 100 kalak, subuk selaku pengurus stasi, pengurus rayon, pengurus paroki, lembaga kategorial bage pe ordo/tarekat si lit i paroki Berastagi.

“Engkai maka megah ateta jadi katolik? Kalak luar pe metehsa maka kita ertutus ate erkiniteken, ertutus ate erdahin. La melala ngerana, la mengayak tersena tapi tetap rusaha erbahan si terulin. Si enda ka me si ikataken penungkunen Presiden maka ia netapken reh dingen erberngi ku Gereja Katolik.”

“Adi siukuri tetap kai dalan ras kite-kitena maka megah ateta jadi katolik, nambah-tambah kap ngenana ateta perpulungenta ras reh nggitna kita erlajar ras erperbahanen nangdangi Gereja. Selaku kalak katolik, kita la terjeng jadi warga lokal, tapi pe jadi warga regional ras pe jadi warga internasional. Adi megermet kam ras pernah kam ku Monas, i ruang museumna lit piagam penghargan man Gereja Katolik. “Indonesia berhutang budi nangdangi pendidiken si isehken Gereja Katolik”, bagem nina tersurat ibas piagam  si itandatangani presiden Soekarno e!”, nina P. Moses ibas kata pengalo-ngalona.

Pastor Ignatius Simbolon, OFM Cap selaku vikaris si ngewakili uskup, ngiahken gelah paripurna enda nggermeti tahun si sangana erdalan e me tahun Martyria. “Mehuli kal adi progam-program ibas tahun enda isemangati tah pe maun ibahan lakon-lakon kerna Martyria!”, nina tupung ia ngerana ibas tegunna. “Tambah-tambah si e, kursus-kursus ras erbage-bage usaha pembinaan umat perlu tetap iperdiateken sabap pertambahanen umat si bilangenna njengangken kita e arus kap itegu-tegu tetap arah nehken pengajaren pe.”, nina ka ngumputi cakapna.

Pastor Emmanuel Sembiring, OFM Cap selaku Propincial Kapusin mabai percakapen ibas terpuk si pemena kerna kai ras uga Biara Kapusin Sapo Malem ras uga ubungan biara e ras paroki. “Kapusin reh ku Sumatera enda ibas tahun 1911 tapi ibas tahun 2006 denga dung erbahan biara Sapo Malem. Kami selaku kapusin seh tahun 1990 tetap erdahin i paroki ras nggejapken maka perlu lit rumah si bagi “oase” i taneh mesawang. Ingan enda terutama man pastor/bruder/frater kapusin tapi ibas terpuk-terpuk tertentu ngaloken kerehen umat tah pe kalak si ertedeh ate nangdangi ingan si sikap guna ndameken pertendin. Kerna kecibalen pastor-pastor si i Jaranguda, banci nge ia ngelai umat, e pe adi lit kejadin si la biasa, umpamana lit alangen pastor si i paroki tah sakit, maka pastor paroki ndilo guna nggancihken dahinna gelah ula lolo.”, nina P. Emmanuel.

Kursus guna Sinegu-negu Asmika, kursus Dirigen ras Kotbah, kursus Kitab Suci ras kursus Litugi, e me keputusen rapat paripurna Berastagi kerna penegun kempak pengurus-pengurus.

Pembangunen gereja i Tanjungbarus, Barusjahe, Stasi Induk, Gurusinga, Doulu Kuta, Semangatgunung, Sukajulu ras Kubucolia si ibas tahun 3013 lolo denga iputusken iterusken ibas tahun enda.

Seakatan si e, tangkas maka pastor paroki si mbaru rusaha pepantek koordinasi ras penegun alu sipaguh-paguhna. E maka iputusken maka kerina pembangunen gereja arus ibenaken ras iarak-arak pastor paroki, kerina keputusen-keputusen i stasi arus leben icakapken ras pastor ras isahken pastor, bage me keputusen ras-ras ibas rapat paripurna e.

Sada si mbaru i paroki Berastagi ibas rapat si sekali enda, maka ibas penutupen rapat paripurna e isehken pe penghargan kempak 5 (lima) stasi si terbaik rikut ras porhanger terbaik. Stasi Sampun (Resta Sembiring), stasi Raya (Set Surbakti), stasi Gurusinga (Sastra Tarigan +), stasi Sada Perarih (Riswan Karo-karo) ras stasi Semangatgunung (Ludovikus Rajin Sinaga) jadi stasi ras porhanger terbaik. Porhanger-porhanger e teridah ermeriah ukur ngaloken piagam pengharhagan si isehken vikep.

Kai kin sarat tahpe pulungen penetapen stasi/porhanger terbaik e? Pastor Moses ngataken si e ibas pemenan pengendesen piagam maka nina: “kesadan arih ibas stasi, kiniliten erbahan lakon/perayan si iarusken, kerajinen nehken adangen stasi ku paroki ras kininggiten stasi e ngikuti pendahin-pendahin paroki!” Bage me ipetangksna kerna pertimbangen-pertimbangen paroki netapken stasi/porhanger terbaik e.(BK)