DIAKON HILARIUS KEMIT RAS PITU DIAKON SI DEBAN ITANGKUHKEN JADI PASTOR

BETLEHEM KETAREN, BERASTAGI

Mbaru-mbaru enda, tepatna ibas wari Kamis tanggal 30 Januari 2015 i gereja Katolik St. Yoseph Jl. Kain Batik Siantar, Diakon Hilarius Kemit si enggo 14 tahun jadi diakon itangkuhken raduken pitu diakon-diakon si deban, eme: Augusto H.M. Nunez, OFMConv; Albino D.R.M. Da Costa, OFMConv; Yanuarius M.T. Berek, OFMConv; Roys S. Nababan, OFMCap; Daniel I. Sitanggang, OFMCap; Eno H. samosir, OFMCap ras Ramses Nainggolan, OFMCap. 

I tengah-tengah kepulungen keluarga ras sangkep nggeluh keluarga diakon, utusen erbage-bage tarekat suster, anak Seminari Menengah Siantar bage pe umat paroki St. Yoseph, telu uskup eme: Mgr. Anicetus B. Sinaga, OFMCap, Mgr Em. A.G. Pius Datubara, OFMCap ras Mgr. Em. Hironimus Bunbu, OFMCap (i Pontianak nari) raduken ras puluhen pastor si mpermakani umat sebelang KAM, missa penangkuhen malim si kurang lebih irayaken 700 kalak e, erdalan salu sikapdingen mehuli. Gereja St. Yoseph si megah, alu kubah si meganjang ras gerga-gerga si metunggung, erbahan penangkuhen e tempa-tempa ilakoken i surga. Teridah i ruang pemasu-masun e, Diakon Hilarius Kemit raduken ras telu diakon si deban kundul arah kemuhen janah diakon Ramses Nainggolan raduken telu diakon temanna kundul arah kawes janah kerina orangtuana kundul arah pudina, make paken adat sekalak-sekalak.

  Mgr. A.B. Sinaga nuriken katana gelah min penangkuhen diakon enda maba keriahen Berita Simeriah man kerina tinepa. “Min kinilitenna jadi pastor mabai kerina jelma meteh ras ngakapi keriahen si rehna ibas Dibata nari”, nina uskup e. Ipersingeti uskup pe gelah kerina pastor si nitangkuhken e tetap terbeluh njaga bana idur erbage-bage cinacat duniawi gelah banci jadi permakan si ermulia. La ia lupa nehken tenah man orangtuana maka anak-anakna e enggo jadi sekerajangen Gereja, si kerajangen umat si erdahin alu gunap man Dibata.

Tupung giliren Hilarius Kemit itangkuhken, uskup jine kentisik erbahan pertawan. “Adi si enda enggo me maun ndekahsa jadi Diakon”, nina erbahan kerina pastor bage pe umat sempat ersurak. Tuhu kenca Itangkuhken jadi diakon ibas tanggal 11 Juli 2000, lit sepuluempat tahun ia jadi diakon. Seakatan erpastoral isina pe paksa-paksana alu erbage-bage pendahin termasuk jadi pengacara keuskupen bage pe jadi Peminpin Umum majalahta enda. Bage pe tupung uskup nuruh kerina pastor si nitangkuhken e masu-masu orangtuana. Enteh engkai idahina uskup bagi si nungkun: “Kai maksudndu e?”. La ndekah kenca si e uskup jine si maju kenca si e alu gaya merendeh erjimpuh mindo gelah ipasu-pasu kerina malim si mbaru. Si enda pe mabai kerina si pulung sempat cirem-cirem ras terharu.

Kenca dung lakon Ekaristi Penangkuhen,  kerina si pulung sumalin ku teratak si enggo i sikapken panitia. Sope man ras-ras ije pe ibahan piga-piga kata pengalo-ngalo. Pembimas Katolik Kanwil Kementerian Agama Sumut Dra. Yulia Sinurat, M.Pd. ngataken keriahen ukurna nangdangi penangkuhen waluh malim si mbaru e. “Kami tetap sikap nampati pengelan Gereja Katolik, sabap kami jine labo lit adi la kin erkiteken kiniliten Gereja Katolik”, nina menai cakapna. Ibas keriahen ukur ijenda iendesken kami perkakas missa lako pemenan pendahinndu. Iarapken kami maka ergiah-giah kam erdahin sabap kiniliten ras pendahinndu tuhu-tuhu niarapken ginemgem si rulo.”, nina ka nerusken cakapna. Man kerina si medanak bage pe pernanden la lupa br. Sinurat e erbelas gelah rapat ula rapatsa ras pastor-pastor  enda. “Min pergaulenta ras pastor enda tetap pebelinken kinitekenta bage pe kiniteken pastor-pastorta nangdangi pilihen geluhna”, nina nutup cakapna.

RD. Gundo Pasaribu, Pr selaku pastor paroki tah pe tuan rumah kerja e pe erkata bujur ija dahin si mbelin e ilakoken i paroki ST. Yoseph. Dung si e erbelas ka me Mgr. A.B. Sinaga ngaloi cakap. Uskup erkata bujur man kerina panitia bage pe si pulung ras  sekali nari ka ia erbelas ngarapken gelah keriahen ukur si lit ibas wari penangkuhen e tetap dingen reh belinna ibas wari-wari si reh erkiteken kerja si nibahan ibas wari enda. (BK)
.