SOSIALISASI PRIORITAS PASTORAL KAM I KABANJAHE: “PELEBEKENLAH PENGEPKEPEN JABU”

BETLEHEM KETAREN

Sosialisasi Prioritas Pastoral man pastor-pastor, DPP ras Anggota Sinode i paroki-paroki sebelang kevikepan St. Yakobus Rasul Kabanjahe ras kevikepan St. Andreas Rasul Sidikalang ilakoken bas Kamis 8 Desember 2016 erketepaten ras Wari Raya Santa Maria Ikandung La Ternoda, i aula PPU SPM Kabanjahe.

Vikjen RP. Elias Sembiring, itemani OFMCap, RP. Martin Nule, SVD ras Jamalum Sinambela i keuskupen nari mabai runggun e, ngataken maka uskup enggo netapken empak tah pe fokus program pastoral ku tahun-tahun si reh enda erpalasken asil sinode VI ras visi misi KAM si arus idalanken ras-ras i kerina paroki.

“Arus kap sada perarihen kita kerina ndalanken kai si enggo itetapken ras metunggung kal adi sada pengodak kita ndalankenca. E maka meriah kal ukur kami kita banci pulung bagenda, enda sada tanda kininggitenta ndalanken pendahinta si enggo isikapken e”, nina RP. Elias Sembiring menai cakapna.

“Kai kin si enggo isikapken e? Kerina asil Sinode VI enggo iaturken jadi 5 target si ijadiken jadi tegun dahin teptep tahunna, emkap: Tahun 2017 Jabu si Ertoto; Tahun 2018 Jabu si Sempabu; Tahun 2019 Jabu si Ermediate ku Keteremen, Tahun 2020 Jabu si Kejuen ras Tahun 2021 Jabu Sumbul Pendilon.”, nina ka nerusken cakapna.

Target-target pertahunna e ipetangkas pastor ras teman-temanna sada persada, ras ikatakenna maka teptep pendahin e arus kap irancang make sukat-sukat target si arus terukur ras banci isiksiki.

“Bas tahun 2017, targetta ningkatken geluh ertoto bas Jabu Katolik. Arapenta 50% perbapan, 80% pernanden ras 100% anak-anak, singuda-nguda anak perana reh ku gereja bas wari Minggu ras ku perpulungen, 100% jabu Katolik ngoge Pustaka Sibadia dua kali seminggu ras 100% ka umat Katolik erpuasa ras erpantang bas paksa si itentukan, ...”nina Jamalum bas tegunna.

Megi-megi target-target si arus itetapken ras ikejar, melala anggota runggu bas paksa sungkun-jabap nuriken kesuliten akapna. Tapi alu manjar-anjar ikataken si mabai runggun e teluna, uga perluna target si arus ikejar, ras kininggiten ngejarsa nge si pentingna. Penuriken kalak e, mabai alu manjar-anajar kerina si runggu dungna banci ngalokensa.

Bas perjumpan e pe, ibahan pe tugas teptep paroki ncubaken erbahan program si erpalasken prioritas pastoral KAM tahun 2017. Teridah teptep utusen paroki ertutus ate ndalankenca, gia melala ka si metahat niakapna erbahansa ras m,indo penampat arah si mabai runggun nari.

Ikataken RP. Elias Sembiring pe maka bas 5 tahun si reh enda, kerna Jabu me arus ipelebeken.

“Bagi si enggo sicakapken ndai kerna, target-target bas lima tahun enda la banci lang maka kursus-kursus, katakese tah pe lakon-lakon si deban, kerna jabu si arus sipelebeken ras ipebueken siprogramken i keuskupenta enda. Subuk i paroki, stasi bage pe lingkungen perlu buen erbahan program kerna Jabu. Seksi Keluarga me si jadi ikuten kerina seksi. Seksi liturgi ngaturken pertoton jabu, seksi katakese nuriken kai siarus ieteh jabu rikutken tegunna ras target tahunen e, bage me seterusna. Adi bage si bahan maka tuhu-tuhu erkesehen ku umat buah-buah Sinode e,  ras seh me tujunna Jabu e selaku Gereja Rumah Tangga si pantek paguh ras ndauh idur percuban-percuban bas jaman si genduari nari”, nina pastor Sembiring mergana e.

RP Karolus Sembiring, OFMCap ngiahken gelah teptep paroki bas kevikepanna banci ndungi erbahan program pendahina gelah ras-ras ilaporken ku keuskupen selambat-lambatna bas tanggal 31 Januari 2017, ras bage ka pe ibahan RP Ipong Suponidi, O.Carm man paroki-paroki i kevikepan Sidikalang. Kerina pastor paroki si reh erpengue ras ngataken banci erbahan program paroki dung bas tanggal si itetapken. (BK).

Natap Gereja St. Bonifasius Stasi Barusjulu Paroki St. Fransikus Assisi Berastagi: “UGA KIN GEREJANTA ENDA?”

 BETLEHEM KETAREN, Ralinggungi.

Adi Medan nari  ku Siantar kita tah ku Sidikalang, ras sipilih lewat Tongkeh ku Kabanjahe siidah me Inkulturatif  Karo si metunggung mehaga ras enggo termurmur ku sebelang-belang dunia. Kune macet i Pajak Roga ras sipilih arah simpang Ujungaji, la ndekahsa minter me kita ialo-alo gereja St. Maria si Sokeliamen Ajijulu si mentereng ras kenca si e si jumpai ka me gereja St. Maximilianus Kolbe Ajibuhara si tarumna gaya Karo.

Tapi adi sipilih Tongkeh nari mentasi Tigajumpa, minter me sidat gereja St. Bonafasius Barusjulu. Kenca si idah gereja-gereja Katolik subuk i Basam, Rumahrih, Paribun apai ka i Sukajulu si bagi tempa-tempa “agi” gereja Inkulturatif Karo si i Berastagi e, ras erkiteken si e, banci jadi turah mamang ateta, ras nungkun kita: “Uga kin Gereja si i Barusjulu e?”

Uga kin Gerejanta enda?

Porhanger ras Sekretaris i lebe gereja (Foto: Ananta P. Bangun)

 Ertiangken buluh, erdindingken tepas si iapit buluh. Adi la lit silang bas rabung atap, mungkin siakap nge enda sapo juma tah gudang rimo. Adi sinen ku bas kerina bangkuna pe iban bas buluh nari.

“Enterem kalak nungkun-nungkun  kerna bangunenta enda.  Kalak Katolik pe mamang atena, apai ka si la Katolik. Piga-piga kali kalak si berkat gawah-gawah  mentas, tandangkenna kal nusur, ras nungkun: “Ini apa?”,... “Gereja?”,... Gereja Katolik?”, nina Bastanta Ginting, porhanger Barusjulu nginget-nginget uga si megati jadi.

“Mulai kin Perpulungen Tanjungbarus ipanteki P. Licinius Fasol Ginting ras Adat Berahmana bas tahun 1962, umat Pepulungen e reh bas 4 kuta nari, emkap Tanjungbarus nari, Basam nari, Siberteng nari ras Barusjulu nari. Erkiteken Perpulungen e tambah tahunna tambah belinna, manjar-anjar jayo me Siberteng, bage pe Basam. Barusjulu ras Tanjungbarus ertahan ndekah sabap gereja lit itengah-tengah dua kuta e. Tapi bas tahun 2010 stasi e imekarken P. Ignatius Simbolon jadi dua rikutken kutana.”, nina Ginting mergana e, nerusken turi-turinna.

“Piga-piga tahun tetap kami ras stasi Tanjungbarus bas gereja situhuna enggo metua e. Kami masuk jam 09.00, Tanjungbarus pukul 11.00. Rikutken ras ketetapen pastor bage pe DPP dungna ibangun me gereja stasi Tanjungbarus bas tapak e, ras kami isuruh ndarami tapak. Gendek kata, datme tapak ijenda ras ibangun alu gotongroyong. Kerina umat subuk perbapan bage pe pernanden ku suah muat buluh ras tepasna isumbangken permotor anak kutanta. Pas lit jadwal pastor, ibengketi. Pastor Evangelis Pardede sanga e, masu-masusa”, nina ka Porhanger e nerusken cakapna.

Ndigan Nge Ate Ipesikap Gereja Enda?

Seakatan erkiteken bangunen “darurat” gereja megati megogo ate umat Katolik stasi Barusjulu njabap penungkunen: “bangunen kai kin enda?”,  alu ukuren bangunen 7 x 11,5m, uga pa pe labo banci nampung kurang lebih 250 kalak umat Barusjulu bas 85 KK. Apaika adi lit pasu-pasu, lakon peridin ras kerja-kerja Gereja si deban. Maka situhuna min enggo perlu ipesikap ras ipegalangi.

“Bas tahun 2014 enggom imasukken paroki bas program kerja mbangun gereja enda. Tapi erkiteken melala denga gereja langa dung, langa surung. Bage pe bas tahun 2015 tetap benget bas program paroki, tapi ipelebe ka stasi si deban. Bas tahun 2016 enda pe mbera bengket, ras min ula ka ipelebe stasi si deban!”, nina ka Pendra Tarigan, sekretaris stasi Barusjulu.

“Uga kin ndia gegeh umat stasi enda?”, nina Ralinggungi niksikisa.

“Lako nukur tapak enda, alu swadana stasi enggo ipedarat sen siwah puluh juta. Bas bulan Januari enda pe kari sibuat ka ateta piga-piga meter nari kupudi gelah enggo tumbuk gedangna 40m. Genduari kas pembangunen lit denga enem puluh juta nari.”, nina Bastanta njabap.

“Guna erbahan gereja si mbaru genduari enda tentu perlu dana antara enem ratus juta ku waluh ratus juta”. Uga nge ndia rencanandu?”, nina ka Ralinggungi.

“Iyah, adi rumah Tuhan sirencanaken sibahan, siendeskenlah man Tuhan. Tambah-tambah si e, mbera erkusik Tuhan kupusuh peraten umatna si rulo, mbera-mbera lit pagi si rate mekuah man stasi Barusjulu.”, nina ka porhanger e.

Pastor Liberius Sihombing, tupung isungkun Ralinggungi ngataken maka melala kal gereja stasi-stasi i paroki Berastagi si ndube ibangun bas tahun 1970-1980 arus iban mbaru erkiteken enggo metua ras lanai siat nampung umat si reh teremna.

“Menam-menam serentak, paroki Berastagi enggo mbagun gereja i Tanjungbarus, Kubucolia, Raya, ras Barusjahe. Genduari kita sangana fokus ku gereja stasi Serdang si bas 30 Oktober 2016 ndai namaken Batu Sipemena ras genduari mulai kenca naik tiangna. Adi enggo pagi dung sue ras rencana bas bulan Juni 2017 enda, banci ka sibenaken pembangunen gereja stasi Barusjulu, tah pe gereja stasi Siberteng. Apai pagi sipelebeken tentu raduken ras DPP sigermeti apai kin si semangatna umat ras panitiana. Adi ngenehen kepentingen umat, gereja stasi Barusjulu pe tuhu-tuhu perlu kal pedas ibangun”, nina pastor paroki Berastagi e.

Mbera-mbera njujuri Dibata, ibegikenna toto umat stasi Barusjulu, minterlah pagi gereja enda ipesikap. (BK).