TANGSI BARUS, S.Pd., “PELAKSANA” SI MBARU DPPH PAROKI BERASTAGI

BETLEHEM KETAREN, BERASTAGI.

Kenca Rapat paripurna paroki St. Fransiskus Asisi Berastagi enggo ilakoken ibas tanggal 6-7 Februari 2015, melala pengurus Gereja tersungkun-sungkun “ndigan ibahan periodesasi ibas tingkat paroki? bage pe Engkai maka periodesasi tingkat paroki ras rayon la ibahan ibas Rapat Paripurna?

Penungkunen-penungkunen e ijabap pastor paroki Berastagi, RP. Moses Elias Situmorang, OFM Cap. ibas kata pengalo-ngalona ibas rapat DPPH ncakapken periodesasi si ibahan ibas wari Rabu, 25 Februari 2015 si lewat, i lebe-lebe 29 kalak si pulung ibas rapat e.

“Semalna, tuhu periodesasi DPPH ibahan ibas Rapat Paripurna. Tapi erkiteken Rapat Paripurna bage pe periodesasi DPPH merluken ketutusen raduken ukur si bulat, itetapken kami maka ulin ibahan salu wari si pelain. Lang pe, si pulung ibas Rapat Paripurna buen porhanger-porhanger si mbaru bage pe pengurus-pengurus si langa tentu ngikuti perdalinen paroki, maka ibas rapat guna periodesasi enda sengaja ipilihi kami utusen-utusen si asa pengidah kami enggo meteh ras ngidah dingen pe enggo ikut muat bagin ibas perdalinen parokinta sedekah enda!”, nina pastor paroki Berastagi e.

Lit pe torosen lakon periodesasi e, bagi semalna rapat bulanen DPPH, ibenaken alu lagu pemenan iterusken alu toto pemenan iumputi alu kata pengalo-ngalo “pelaksana” definitif. Kenca bage bengket me ku lakon periodesasi si ibenaken alu penegun pastor paroki, penjaringen calon  ras lakon pemilihen “pelaksana”. Kenca si e  ibere kesempaten man “pelaksana” terpilih, kata-kata sambuten, toto pendungi ras ende-enden pendungi janah salam-salam.

Ibas penjaringen, rikutken sora si masuk idat me gelar calon “pelaksana” eme: David Usaha Tarigan 7 sora; Tangsi Barus 18 sora ras Pasti Patrisius Sitepu, Betlehem Ketaren bage pe Efendi Sembiring, sekalak-sekalak 1 sora. Sue ras si enggo itetapken ibas pemenan rapat, itetapken me 3 gelar calon bengket ku pemilihen, eme: David Usaha Tarigan, Tangsi Barus ras Pasti Patrisius Sitepu (gelar si perpudi iteki leben iperidiken asangken dua si gelar si debanna si  ndatken sora si seri. Ibas kedungenna, alu sada putaren pemilihen terpilih me Tangsi Barus jadi “Pelaksana” alu perbandingen sora 23: 6 ras Tarigan mergana e.

Tersinget tersenana, Tangsi Barus  “pelaksana” terpilih e ibas tep-tep warina erdahin selaku guru i STM Negeri Merdeka ras pernah pe jadi Kepala STM Swasta Pijer Podi Berastagi. Stasi asalna eme stasi St. Monika  Serdang. Kemberahenna gelarna Betna br. Sembiring Kembaren, stasi asalna stasi Bawang ras anak ipupusna 2 dilaki, sada kuliah denga sada tamat ras enggo erdahin. Jabuna ringan i Simpang Ujungaji Berastagi. Sedekah enda pe, man bana enggo ibere erbage-bage tanggungjabap ngurus Gereja (si asa pengidahku si nuratken berita enda) eme: Anggota DPPH Berastagi periode 2010-2014; Sekretaris Dewan Pastoral Stasi Induk periode 2010-2014; Ketua Stasi (genduari jadi lingkungan) St. Theresia Berastagi; dua kali erketerusen jadi Ketua pelaksana Natal Pernanden ras Lansia Paroki Berastagi (Tahun 2013 ras Tahun 2014) janah jadi ketua Organizer Commite Rapat Paripurna Paroki Tahun 2013.

Kenca dung pemilihen “pelasana” e, minter ka me isusun kabinet arah penegun pastor paroki, “pelaksana” terpilih ras “pelaksana” dan wakil “pelaksana”  si ndekah. Pastor Leo Joosten Ginting bage pe P. Ignatius Simbolon ibas kata pengalo-ngalona nangdangi Ketua Pelaksana si mbaru e rikut ras susunen DPPH si mbaru, ngataken keriahen ukurna sabap arah periodesasi e enggo teridah seakatan erdalin regenerasi alu kadernisasi si sikap, “pelaksana” si mbaru pe enggo itandai   selaku sekalak si nggit mere diri, ukur ras pusuhna lako pemajun paroki. Bage pe kerna susunen personil DPPH si mbaru lit denga ije si enggo erpengalamen, ras enterem ka personil si mbaru ibas seksi-seksi. Tambah-tambah si e, iingetken pastor e duana maka min pengurus DPPH si mbaru e banci ersada arih ersada ukur terlebih-lebih lako ndalanken program-program pengembangen diri pengurus arah kursus-kursus bage pe pengepkepen kalak si nguda arah ndalanken  Megabina Generasi Muda sue ras si iperentahken Uskup Agung Medan.

Pendahin “pelaksana” sue ras si tersurat ibas Anggaran Dasar Paroki pasal 50, eme: (1) ngarak-ngarak lingkungen si mbaru ibentuk arah penuruhen pastor; (2) njaga ras nggancihken partor paroki ibas situasi si genting; (3) jadi fasilisator rapat alu penuruhen pastor; ras si debanna.  Ibas kesempaten si tepat, kusungkun pe Tangsi Barus kerna sura-surana. “Yak.. senina, adi kam enggo terpilih, kai dage sura-surandu ibahanndu guna perkembangen parokinta enda?”

“Aku enda pelaksana, senina. Maka tentu raduken pastor-pastorta bage pe kita kerina, sidahikenlah kai si enggo iprogramken jadi pendahinta sue ras keputusen Rapat Paripurna. Tambah-tambah si e, ateku ngikutken pastorta tep-tep sermon dua bulanen ras mere waktu ibas  aku isuruh pastor ku stasi tah ku rayon gelah banci sieteh kai kin situhuna sura-sura ras persoalen-persoalen si lit i stasi-stasi, guna ras-ras kita ngarihken solusina.”, nina Barus mergana e erjabap.

Proficiat man bandu Ketua pelaksana si mbaru, maju terus paroki St. Fransiskus Asisi Berastagi. (BK)

PEMBEKALEN PORHANGER PAROKI BERASTAGI ERDALAN ALU ERLAYAS

BETLEHEM KETAREN, BERASTAGI

Periodesasi pengurus Gereja subuk i stasi, rayon bage pe i DPPH i Paroki St. Fransiskus Asisi Berastagi enggo dung ilakoken, ras pelantiken porhanger-porhanger e pe enggo ka ilakoken ibas tanggal 7 Februari si lewat. Erkiteken melala porhanger  e mbaru terpilih,  maka lako pesadaken ukur dingen odak jingkangna ras porhanger si enggo liten pengalamenna, gelah radu seperukuren ras sepenggejapen ku visi ras misi paroki, maka rikutken ras ulih Rapat Paripurna paroki, ibahan me perjumpan 2 wari Pembekalen Porhanger.

"La ndekah kenca pengurus awam itangkuhken tentu perlu kal ibere bekal gelah sepengodak sepengole kita kerina ku visi ras misi parokinta. Lakon Pembekalen enda enggo itetapken sue ras keputusen Rapat Paripurnanta ras silakoken me sendah", nina P. Moses bas kata pengalo-ngalona.

Pulung ibas lakon pembekalen e, 20 porhanger, 4 ketua rayon ras 1 pelaksana si mbaru, i Samadi Maranatha, ibas tanggal 27 seh 28 Februari si lewat. Lit 3 turih cakap si icakapken ibas lakon pembekalen e, eme: “Pemahamen kerna Anggaran Dasar Paroki” si isehken P. Moses Elias Situmorang, OFM Cap.; “Kai ras Uga Peminpin Tulin” isehken P. Michael Hutabarat, OFM Cap.; ras “Pengantusen kerna Pengertin Gereja ras Lima Tugas Gereja”, si isehken Betlehem Ketaren.

“Sekalak Porhanger eme sekalak peminpin i stasi. Ia bagi sekalak pengulu kuta, si ibas ia nari reh kata si itenahken paroki lako cikepen geluh Perpulungen dingen arah ia ka me isehken ku paroki kai kin sura-sura stasi. Arus kap bagi kalak si sentudu man usihen ia ras katana arus masin man umat si ikepkepna. Porhanger sada lako jabat si penting i KAM enda, maka banci pe ikataken “kepala” tah pe “komendan” stasi, rikutken ras si isuratken i Anggaran Dasar Paroki, nina pastor Moses menai cakapna.

“Anggaran Dasar Paroki enda mehuli pe ijadiken jadi “garis” ibas erbahan “Anggaran Rumah Tangga Stasi”. Ibas Anggaran enda enggo tangkas kai kin dahin Porhanger ras kerina temanna si sada pendahin rikut ras si lit ibas seksi-seksi. Tugasta kerina eme lako nerusken pendahin Kristus lako mpermakani, pebadiken ras ngelai umat bage pe dirinna sendiri. Alu bage, min kai si ibahan sekalak porhanger i sada stasi la pelain-lain ras si ibahan porhanger si deban i stasi si pelain, seakatan si khas perlu man stasi e. Ula min kita melebesa erbahan Anggaran Rumah Tangga si isina la rikutken Anggaran Dasar Paroki enda, umpamana alu melukah pesisiken umat erkiteken la aktif  ku Perpulungen tah pe ngerarang ngeliturgiken kalak si enggo iperidiken erkiteken alasasen ngelanggar Anggaran Rumah Tangga si ibahan alu mekarus. Ndauh kal ulin ibahan ketentun uga kin pengurus ngiah-ngiahi, ngingetken ras mabai umat si la aktif gelah turah dingen erburak ukurna erGereja”, nina ka pastor Moses.

Pastor Michael Hutabarat, menai tegunna alu erbahan sada teka-teki ngubungken 9 titik alu empat garis si la peltep. Kenca idahna si pulung e menam ngelabuh, ikatakenna jabapna, rikut pe ras tenahna: “la mehuli kita mbalengi dirina alu baleng-baleng si la arus”, nina. Alu dem ukur si erburak, erbage-bage kanam-kanam ras pengalamen-pengalamen, iterusken pastor e negu-negu porganger-porhanger e gelah ngasup ngantusi uga arusna jadi peminpin si tulin. Ibas perpudi tegunna isehkenna pe maka lit 7 sarat peminpin si la erleka ras Kesah kepeminpinenna, alu nina:

“Pertama, ersadalah tetap ras Tuhan gelah Ia tetap ngarak-ngarak kepeminpinenndu. Sipeduaken, jadilah kam bagi sira ras tendang nangdangi kalak si ipinpinndu gelah ia kerina mesikel ndeher ras kam. Siperteluken, utamaken ndarami si pematang, emkap Kesah kepeminpinen si nelamatken kalak si ipinpinndu, ula ngutamaken si arusna terjeng umputen, bagi ndarami kekuasan tah pe keriahen si enterem jine.”, nina P. Michael.

“E maka si peempatken, pindolah pasu-pasu kepentaren man Tuhan gelah kam minpin alu pusuh si beluh mbedaken apai si mehuli ras si jahat. Si pelimaken, jadilah kam peminpin si erkiniteken sabap kiniteken me si ergegeh nampati kinilangasupen manusia ras jadi ampang-ampang ngelawan sura-sura si jahat. E maka, si peenemken, erdahin ras ertotolah (Ora et Labora) gelah Kesah kepeminpinen e tetap megegeh bas kam. Si perpudi, si pepituken,  jagalah Kesah kepeminpinen tetap kukuh, eme: penalemen, tanggungjabap, kehormaten, kinimbisan, usihen, kepentaren ras kiniteken man Dibata, nina P. Michael nerusken cakapna.

Sinehken kerna antusen kerna pengertin Gereja ras tugas Gereja nekanken maka gia gereja selaku rumah ingan Perpulungen e penting lako ngerayaken kiniteken ras si jadi ingan ngaloken erbage-bage pemasun tapi labo si terpenting. Si terpenting, bagi si niusihken Gereja Sipemena bage pe rikutken ajaren Pustaka Sibadia maka pengertin Gereja eme selaku Umat Dibata; Kula Kristus; Persadan Ajar-ajar; Peningggeren Kesah Sibadia; Kalak ibas Perdalanen; Persadan Sibadia ras Lembaga (Institusi). Iteruskenna pe, maka banci itepukken ku 5 terpuk tugas Gereja eme lako mpersadaken; ngelai alu kekelengen; siajar-ajaren; ngerayaken kiniteken ras ersaksi kerna penuruhen Dibata man banta sekalak-sekalak ibas orat geluhen selaku kalak Kristen si benar.

Kerina si iisehken si maba cakap e, ipegejap-gejapken ibas diskusi kelompok, pengukuhen-pengukuhen ras ibas Perayan Ekaristi. Porhanger-porhanger teridah puas ras meriah ukurna ngaloken pembekalen e bage pe ibas ngaloken bekal-bekal si deban, bagi: kitap katekismus katolik "Mejuah-juah Man Bandu, Anggaran Dasar Paroki ras erbage-bage kitap si niarapken banci jadi bekal pengurus erdahin. Tangkas pe siang ayona tupung ergambar ras-ras kenca dung pembekalen ras alu erburak pusuhna mulih ku kutana lako ndahiken tegunna ngelai umat si rulo i stasina sekalak-sekalak. (BK).