DIAKON HILARIUS KEMIT RAS PITU DIAKON SI DEBAN ITANGKUHKEN JADI PASTOR

BETLEHEM KETAREN, BERASTAGI

Mbaru-mbaru enda, tepatna ibas wari Kamis tanggal 30 Januari 2015 i gereja Katolik St. Yoseph Jl. Kain Batik Siantar, Diakon Hilarius Kemit si enggo 14 tahun jadi diakon itangkuhken raduken pitu diakon-diakon si deban, eme: Augusto H.M. Nunez, OFMConv; Albino D.R.M. Da Costa, OFMConv; Yanuarius M.T. Berek, OFMConv; Roys S. Nababan, OFMCap; Daniel I. Sitanggang, OFMCap; Eno H. samosir, OFMCap ras Ramses Nainggolan, OFMCap. 

I tengah-tengah kepulungen keluarga ras sangkep nggeluh keluarga diakon, utusen erbage-bage tarekat suster, anak Seminari Menengah Siantar bage pe umat paroki St. Yoseph, telu uskup eme: Mgr. Anicetus B. Sinaga, OFMCap, Mgr Em. A.G. Pius Datubara, OFMCap ras Mgr. Em. Hironimus Bunbu, OFMCap (i Pontianak nari) raduken ras puluhen pastor si mpermakani umat sebelang KAM, missa penangkuhen malim si kurang lebih irayaken 700 kalak e, erdalan salu sikapdingen mehuli. Gereja St. Yoseph si megah, alu kubah si meganjang ras gerga-gerga si metunggung, erbahan penangkuhen e tempa-tempa ilakoken i surga. Teridah i ruang pemasu-masun e, Diakon Hilarius Kemit raduken ras telu diakon si deban kundul arah kemuhen janah diakon Ramses Nainggolan raduken telu diakon temanna kundul arah kawes janah kerina orangtuana kundul arah pudina, make paken adat sekalak-sekalak.

  Mgr. A.B. Sinaga nuriken katana gelah min penangkuhen diakon enda maba keriahen Berita Simeriah man kerina tinepa. “Min kinilitenna jadi pastor mabai kerina jelma meteh ras ngakapi keriahen si rehna ibas Dibata nari”, nina uskup e. Ipersingeti uskup pe gelah kerina pastor si nitangkuhken e tetap terbeluh njaga bana idur erbage-bage cinacat duniawi gelah banci jadi permakan si ermulia. La ia lupa nehken tenah man orangtuana maka anak-anakna e enggo jadi sekerajangen Gereja, si kerajangen umat si erdahin alu gunap man Dibata.

Tupung giliren Hilarius Kemit itangkuhken, uskup jine kentisik erbahan pertawan. “Adi si enda enggo me maun ndekahsa jadi Diakon”, nina erbahan kerina pastor bage pe umat sempat ersurak. Tuhu kenca Itangkuhken jadi diakon ibas tanggal 11 Juli 2000, lit sepuluempat tahun ia jadi diakon. Seakatan erpastoral isina pe paksa-paksana alu erbage-bage pendahin termasuk jadi pengacara keuskupen bage pe jadi Peminpin Umum majalahta enda. Bage pe tupung uskup nuruh kerina pastor si nitangkuhken e masu-masu orangtuana. Enteh engkai idahina uskup bagi si nungkun: “Kai maksudndu e?”. La ndekah kenca si e uskup jine si maju kenca si e alu gaya merendeh erjimpuh mindo gelah ipasu-pasu kerina malim si mbaru. Si enda pe mabai kerina si pulung sempat cirem-cirem ras terharu.

Kenca dung lakon Ekaristi Penangkuhen,  kerina si pulung sumalin ku teratak si enggo i sikapken panitia. Sope man ras-ras ije pe ibahan piga-piga kata pengalo-ngalo. Pembimas Katolik Kanwil Kementerian Agama Sumut Dra. Yulia Sinurat, M.Pd. ngataken keriahen ukurna nangdangi penangkuhen waluh malim si mbaru e. “Kami tetap sikap nampati pengelan Gereja Katolik, sabap kami jine labo lit adi la kin erkiteken kiniliten Gereja Katolik”, nina menai cakapna. Ibas keriahen ukur ijenda iendesken kami perkakas missa lako pemenan pendahinndu. Iarapken kami maka ergiah-giah kam erdahin sabap kiniliten ras pendahinndu tuhu-tuhu niarapken ginemgem si rulo.”, nina ka nerusken cakapna. Man kerina si medanak bage pe pernanden la lupa br. Sinurat e erbelas gelah rapat ula rapatsa ras pastor-pastor  enda. “Min pergaulenta ras pastor enda tetap pebelinken kinitekenta bage pe kiniteken pastor-pastorta nangdangi pilihen geluhna”, nina nutup cakapna.

RD. Gundo Pasaribu, Pr selaku pastor paroki tah pe tuan rumah kerja e pe erkata bujur ija dahin si mbelin e ilakoken i paroki ST. Yoseph. Dung si e erbelas ka me Mgr. A.B. Sinaga ngaloi cakap. Uskup erkata bujur man kerina panitia bage pe si pulung ras  sekali nari ka ia erbelas ngarapken gelah keriahen ukur si lit ibas wari penangkuhen e tetap dingen reh belinna ibas wari-wari si reh erkiteken kerja si nibahan ibas wari enda. (BK)
.

RAPAT PARIPURNA RAS PELANTIKEN PORHANGER MBARU i PAROKI BERASTAGI

S

egedang 2 hari tepatna ibas tgl. 06 seh 07 Februari 2015 si lewat, Paroki St. Fransiskus Asisi Berastagi si ipinpin RP. Moses Elias Situmorang, OFM Cap, erbahan Rapat Paripurna, i Samadi Maranatha Berastagi.

Lit 135 kalak pulung ibas rapat paripurna si sekalenda, si reh selaku Porhanger, Sekretaris ras Bendehara teptep stasi bage pe lingkungen i kota Berastagi, Porhanger-porhanger si mbaru terpilih, pengurus-pengurus rayon, pengurus-pengurus lembaga kategorial bage pe utusen idur Lembaga Hidup Bakti i lingkungen paroki ras tentuna la ketadingen kerina pengurus DPPH paroki.

Rapat e Ibenaken alu Ibadat Pemulka ibas pukul 16.00 ras kenca si e iterusken alu Studi Bersama si ipinpin P. Agustinus Yew, OFM Cap kerna “Jabu si Jadi Seminari si Pemena ras si Pematang”.

Erpalasken ogen si tersurat ibas Kitap Kejadin 2: 8-25, ipetangkas pastor e uga kin arusna si perbulangen ras ndehara erperukuren ras erperbahanen gelah dat kemalemen dingen ketuahen ibas jabu rikutken ras peraten Dibata. Alu gaya si khas P. Agustinus banci naban pusuh kerina si megiken ia, sung ibabaina peserta rapat e tawa sung ka rempet ersurak, ibas ia ngenehen uga kin pengelakona sekalak-sekalak ibas jabuna erperbulangen ras erdehara. Maka ibas pendungi cakap, langsung piga-piga kalak erbelas mindoken gelah lakon si bagenda rupa perlu kal rusur ibahan kempak pengurus raduken ras ndehara/perbulangenna.

Kenca man berngi, RP. Ignasius Simbolon, OFM Cap. selaku vikep Yakobus Rasul Kabanjahe muka rapat e alu rasmi. Ibas pemenan cakapna, P. Ignasius nehken persentabinna wari rapat e wari e rembang mehuli, melala lakon sada warina, nina.

“Paripurna eme sidang si meganjangna, maka kerehen uskup arah wakilna jadi sada tanda kesadan gereja lokal. Kerina si pulung eme kalak pilihen, lako ernehen dingen pendahin si sada tahun janah ijenda kame irancang pendahin sada tahun ku lebe si niarapken maba kemajun paroki  ibas pepantek kinirajan Dibaa rikutken pendahinta sekalk-sekalak.”, nina ngumputi cakapna.

“Lit pe tenah-tenah kami guna rapatta enda, eme: Gereja selaku Perpulungen Kristus tuhu dahin si la melukah sababpGereja labo organisasi tapi organisme (kegeluhen kalak Kristen erpalasken Kesah Sibadia). Adi ormas tegas lit ukumen-ukumen guna si ngelanggar aturenna, tapi ibas Gereja hukumna eme hukum kekelengen.” nina ka nerusken cakapna.

Kerna pengurus si erkualitas, isingetken P. Ignas maka piga-piga pulungenna si perlu eme: Pemahaman kiniteken si cukup kerna Gereja bage pe pendilon jadi pengurus; Pengalamen iman, Spiritualistas Geluh Pertendin; ras Perbahanen-perbahanen si mehuli selaku  kesaksin nggeluh.

Isehken vikep pe piga-piga tenah keuskupen, eme: 1. kerna habitus si mbaru Gereja KAM si mentingken pembangunen Gereja si nggeluh arah katakese, kursus-kursus bage pe erbage-bage penegun; 2. kerna tahun 2015 selaku tahun Hidup Bakti : si niarapken jadi dalan pediateken ras njaga kebadian kegeluhen; ras 3. kerna Bina Iman Kaum Muda si jadi dalan pekena-kena Gereja guna paksa si nangdangi reh.

“Tep-tep dahin si dahiken kita ibas tahun enda ndai banci ikataken erdalan alu mehuli. Labo kita saja ngatakenca bage, tapi melala umat tersinget, janah terlebih uskup tupung visitasi ras nehken Krisma, ngataken kai si ibahan kita alu ser-ser ibas stasi bage pe rayon enda mehuli kap, nina.” sumekah pastor Moses.

Kenca ibuka vikep alu rasmi, rapat paripurna terpuk si pemena ibabai RP. Moses Situmorang, OFMCap guna nggermeti kerna data ras situsi umat, susunen pengurus DPPH periode 2010-2015, program kerha tahun si lewat bage pe lapuren kerna perbeliten.

“Terlebih-lebih tep-tep kerja paroki si iban kita alu man ras-ras janah ipesikap alu ras-ras labo alu simaba-maba nakanna tah ikateringken, si enda gia lit ijah ije kekurangenna tapi mehuli tetap siterusken sabap alu ngakat kearifan lokalta, banci mulihi jadi usihen man jelma si enterem.”, nina ka nerusken cakapna.

Anggota-anggota rapat teridah ertutus ate ngikuti rapat enda raduken ras piga-piga lit ka si nungkun ras lit si ngingetken kerna kai si ibahan i stasi ras i rayonna ibas tahun si enggo lepas e.

Ibas wari sipeduaken, Sabtu 07 Februari, kenca ibuka alu ibadat erpagi-pagi, iterusken ka rapat terpuk si peduaken guna ngenehen ras-ras rancangen-rancangen keputusen guna program tahun si erdalan.

Kursus katekese, kursus Kitab Suci bage pe Kursus Litugi isetujui ilakoken ibas tahun enda. Bage pe guna porhanger si mbaru ibahan me kursus pembekalen si irencanaken iban ibas tanggal 27-28 Februai enda.

Ibas pertengahen tah pe i perpudi tahun enda, irancang ka pe sada lakon rekoleksi guna porhanger ras keluargana lako tetap pelayasken pengelaina man umat.

Kerna perayan-perayan paroki, itetapken pe maka perayan Paska Gabungan ras OMK pagin ibahan i stasi Tanjungbarus  ibas tanggal 12 April 2015, Perayan Natal Asmika i Stasi Raya ibas tanggal 25 Desember ras Natal Pernanden ras Lansia i Berastagi ibas tanggal 27 Desember 2015.

Pelantiken Porhanger

Ibas perayan liturgi penutupen rapat paripurna, ringan i Gereja Inkulturatif Karo Berastagi ilakoken pe pelantiken porhanger-porhanger si enggo terpilih ibas pemilihen si enggo ibenaken ibas bulan Oktober tahun si lepas.

Porhanger-porhanger ergambar ras-ras kenca ilantik vikep.

Lit pe porhanger-porhanger si ilantik e, eme: Andi Surbakti (Merdeka); Andreas Hermanto Tarigan (Stasi Induk); Bastanta Ginting (Barusjulu); Bismon Barus (Doulu Kuta); Darma Barus (Barusjahe); Dison Barus (Jumapadang); Ganevo Ginting(Raya); Gelori Sembiring (Sampun); Ingan Br. Sembiring (Serdang); Kilo Trigan (Basam); Lian Br. Barus (Rumahrih); Lusin Sinuhaji     (Ajibuhara); Mahlan Ginting (Gurusinga); Pasti P. Sitepu (Sukajulu-Tigajumpa); Remon Sitepu (Ajijulu); Riswan Karo-karo (Sadaperarih); Robinta Sembiring (Semangatgunung); Samion S. Kembaren (Doulu Pasar); Senen Tarigan(Siberteng-Kabung); Seth Sembiring (Kubucolia); Udit Ginting (Paribun); ras Yason Waruwu (Tanjungbarus).

Ibas lakon e pe ibahan ka serah-terima jabaten idur porhanger si ndekah kempak porhanger si mbaru, si alu simbolis ilakoken porhanger stasi induk Berastagi. Alu bage, iarapken maka mulih rapat enda kerina porhanger si mbaru enggo banci alu sikap ndalanken pendahinna ngelai umat si iendesken uskup erkelangken pastor paroki man bana.

Proficiat Paroki Berastagi, Proficiat Porhanger si mbaru!

Betlehem Ketaren.