WARI ULANG TAHUN PASKIBRAS I TANEH KARO MERIAH

 HEPI GINTING, Kabanjahe,Ralinggungi

       Wari ulang tahun Paskibras (pasuken Pengibar Bendera Sekolah) Taneh Karo, i lakoken ibas wari Jumat, Sabtu ras Minggu tanggal 12,13 ras 14 September 2014. Lakon e i lakoken i SMA St Maria i Gg. Garuda ras SMA Katolik 1 Jalan Irian Kabanjahe. Enda me lakon wari ulang tahun si pe sepulusiwahken. Bagi si nituriken Panitia man aron ralinggungi, maka lit piga-piga sekolah si ikut muat bagin ibas lakon e. E me kap SMA St Maria Kabanjahe, SMA Katolik 1 Kabanjahe, SMA Negeri 2 Kabanjahe, SMK Negeri 1 Kabanjahe, SMA Muhamadyah Kabanjahe, SMA Negeri Munte, SMA Negeri Tigapanah, SMK Negeri 1 Berastagi, SMK Negeri Merdeka ras SMK Pijer Podi. Panitia lakon e, e me kap, Ketua: Jati Ubaya, Wakil Ketua:Dicky Iskandar Tarigan, Sekretaris:Rio Ginting, Wakil Sekretaris: Yakobus Perangin-angin,  Bendahara: Regina Mayangsari, Wakil Bendahara: Putri Mira.

 

     Lakon e i rasmiken ibas pegawai Dinas Pendidiken Kabupaten Karo nari, e me kap Feri Jhonson Ginting. Wari si pemena ras si peteluken i lakoken i SMA St Maria, ras wari si peduaken i lakoken i SMA Katolik 1 Kabanjahe. Kerina anak sekolah anggota Paskibras ngikuti perlumban ras pertandingen alu semangat si paguh. Terlebih lebih ibas wari si peduaken, aminna gia udan wari, la erbahansa surut ukur kerina si reh. Arah lakon enda pe banci a iarapken rakuten anak sekolah reh bagesna janah banci ka pe nilah ibas dahin si la mehuli, umpamana Narkoba, pinakit AIDS ras dahin si la mehuli si debanna.

       Lit pe Juara pertandingen ras perlumban  ibas lakon wari ulang tahun Paskibras tahun 2014 e me kap, bagi siisuratken iteruh enda.

JuaraVokal grup: Juara 1 : SMA St Maria Kabanjahe; Juara 2 : SMA Katolik 1 Kabanjahe; ras Juara 3 : SMA Muhamadyah Kabanjahe.

Ibas perlumban Vokal Solo, juara-juarana, eme : Juara 1 : SMA St Maria Kabanjahe; Juara 2 : SMA Negeri Tigapanah; ras Juara 3 : SMA Katlolik 1 Kabanjahe. Juara ibas perlumban Bola Basket si dilaki, eme : Juara 1: SMA Katolik 1 Kabanjahe; Juara 2 : SMA Negeri 2 Kabanjahe ras Juara 3 : SMA St Maria Kabanjahe.

Tambah si e, lit ka Juara ibas Ersatur si dilaki, eme : Juara 1 : SMA Muhamadyah Kabanjahe; Juara 2 : SMA Negeri Munte ras Juara 3 : SMA Negeri 1 Berastagi. Ras ibas Ersatur si diberu  lit pe juara-juarana, eme: Juara 1 : SMA Negeri Tigapanah; Juara 2 : SMK Negeri Kaabanjahe; ras Juara 3 : SMA Negeri 2 Kabanjahe.

Ibas perlumbaan Puisi, juara-juarana:  Juara 1 : SMA St Maria Kabanjahe; Juara 2 : SMK Negeri Kabanjahe; ras Juara 3 : SMA Muhamadyah Kabanjahe. Perlumbaab Bola Volli si dilaki, imenangken  : Juara 1 : SMA Katolik 1 Kabanjahe; ras Juara 2 : SMA Negeri Munte. Ibas perlumbaan Bola Volli si diberu : Juara 1 : SMA Katolik 1 Kabanjahe; ras Juara 2 : SMA St Maria. Pelumbaan Estafet Pingpong, juara-juarana, eme Juara 1 : SMA Negeri 2 Kabanjahe; Juara 2 : SMA St Maria Kabanjahe; ras Juara 3 : Trigab Berastagi.

Lako erbahan perlumban e meriah, ibuat kape juara-juala Yel-Yel emekap: Juara 1 : SMA Negeri Tigapanah; Juara 2 : SMA St Maria Kabanjahe ras Juara 3 : SMA Katolik 1 Kabanjahe. Janah ibas-perlumban-perlumbasn si deban, eme: Cerdas Tangkas : Juara 1 : SMA St Maria Kabanjahe; Juara 2 : SMA Negeri 1 Berastagi ras Juara 3 : Muhamadyah Kabanjahe; Lomba nanggerken pangan: Juara 1 : SMA Katolik 1 Kabanjahe; Juara 2 : SMA St Maria Kabanjahe; ras Juara 3 : SMA Negeri 2 Kabanjahe; Lomba kiam ibas guni : Juara 1 : SMA St Maria Kabanjahe; Juara 2 : SMA Katolik 1 Kabanjahe Juara 3 : SMK Negeri 1 Kabanjahe;  Tarik tambang si dilaki : Juara 1 : SMA St Maria Kabanjahe; Juara 2 : Trigab Berastagi; ras Juara 3 : SMA  Negeri Munte. Tarik Tambang si diberu : imenangken Juara 1 : SMA St Maria Kabanjahe; Juara 2 : SMA Negei Munte; ras Juara 3 : SMK Negei Kabanjahe.

Erpalasken si e maka lit pe Juara Umumna, eme 1 : SMA St Maria Kabanjahe, Juara Umum 2 SMA Katolik 1 Kabanjahe,Juara Umum 3: SMA Negeri 2 Kabanjahe.

      Selamat man bandu anak-anak kami, tutus ate erlajar ras memahat man Guru ras Orang Tua, gelah seh pagi sura-surandu.   (HG).

PENANGKUHEN RD PARLINDUNGAN SINAGA PR I KABANJAHE: “TUHAN ENGGO NDILO KAM GUNA NDALANKEN SURA-SURANGKU”

HEPPI GINTING, KABANJAHE.

  Ibas wari si salang sai, rembang katikana wari mehuli: Jumat, 19 September 2014, lakon sakramentali si mbelin si enggo ndekah itimai-timai umat si rulo, terlebih-lebih si ringan i paroki St. Maria si Sokeliamen i Angkat ku Surga, Kabanjahe enggo erdalan alu mehuli, eme penangkuhen malim si mbaru RD Parlindungan Sinaga Pr.

 Lakon e i benaken i lebe-lebe Gereja alu Toto Pemena si ibabai   uskup Agung Medan Mgr Anicetus B Sinaga OFMCap. Sope denga bengket ku Gereja maka kempak uskup , pastor paroki RD Rudianto Sitanggang Pr ras Malim si mbaru RD Parlindungan Sinaga Pr e, i burai alu bunga Drs Caprilus Barus, selaku panitia. E maka arah pembabai uskup, kerina umat bengket me ku Gereja, i arakken malim si deban. Peraraken bengket e teridah tuhu-tuhu metunggung ibas pengaraken gendang ras ende-enden si pemena.

     Ibas Gereja, lakon penangkuhen malim si mbaru tergejap tuhu-tuhu serta, sabap ilakoken ibas Lakon Ekaristi Sibadia. Lit empat dampar si itekanken uskup ibas korbahna, e me kap, si pemena: erbahan ibadat tep-tep wari alu teratur pagi-pagi ras karaben;  si peduaken: ngoge pustaka si badia tep-tep wari  bage pe erkatakese man umat; si peteluken: erbahan misa ras meditasi; ras si peempatken: ngaku dosa sekurang-kurangna sekali setahun.

Bage ka pe ipersingetina man malim si deban maka adi jadi malim  gelah ertutus ate ngelai umat. Lit contana nina, lit malim sepuluh empat tahun la ngaku dosa. Bage pe sakramen-sakramen si lit ibas Gereja enda pe jadi kewajiben. Umat pe i arapken gelah njagai malimna alu njagai kiniteekenna.

Kenca lakon nuri-nuri e dung, iumputi alu melasken janji imamat ras makeken stola ras kasula. Iterusken alu penangkuhen ibas bapa Uskup nari ras pemasu-masun ibas malim si deban si lit ibas piga-piga tarekat.

        Asa si pengidah kami, rehpe  ku lakon penangkuhen e, e me kap keluarga malim si mbaru, malim-malim ibas KAM, pengurus DPPH Paroki St. Maria si Sokeliamen Iangkat ku Surga, pengurus DPPH paroki  St. Petrus ras Paulus, pengurus DPPH paroki St. Lusia Parlilitan, suster-suster si lit ibas piga-piga kongregasi, terpuk paduan suara Gita Nada, Deo Gratias, Dewan Stasi, guru-guru ibas Sekolah Katolik  ras umat si lit ibas piga-piga Paroki.

       Dung kenca lakon Ekaristi ras penangkuhen, e maka lakon i umputi alu kata pengalo-ngalo ras hiburen. Ibas lakon nehken kata pengalo-ngalo e, erbelas pe pengurus DPP ras malim paroki St. Maria si Badia Iangkat ku Surga kabanjahe, pengurus paroki St Petrus ras Paulus Kabanjahe, pengurus paroki St. Lusia Parlilitan, uskup Agung Medan, malim ibas perseninan kongregasi Projo (Pr), malim si mbaru ras pe keluargana.

Lakon hiburen si erbahan lakon kata-kata pengalo-ngalo reh riahna reh idur Sekolah SMA Katolik 1 Kabanjahe, TK Sint. Xaverius, SD St. Josep, OMK Stasi Induk, Anak Sekolah Minggu Stasi induk ras perbapan lingkungen St. Bernadetta.

     Ibas lakon man ciger, panitia pe la lupa ngendesken nakan Manuk Sangkepi man malim si mbaru ras keluargana. 

Bio Data RD Parlindungan Sinaga Pr.

Ingan Tubuh: Tarabintang, 23 Maret 1983; Gelar Orangtua: Tarcisius Sinaga (+)/Lermina Katarina br Sihotang(+)/Katarina Ernawati br Butar-butar. Asal Paroki: Paroki St Lusia Parlilitan, KAM. Pendidiken:

SD Inpres Tarabintang 1990-1996; SMP RK Maria Pakkat 1996-1999; SMU Seminari Menengah Christus Sacerdos Pematang Siantar 1999-2003. Jenari Tahun Orientasi Rohani  Sinaksak 2004-2009; Pendidikan Teologi STFT St Johanes P.Siantar 2004-2009; Tahun Orientasi Pastoral i Paroki St Josep Jl Bali P.Siantar 2009-2011 ras Pendidiken Filsafat Teologia STFT St Johanes P.Siantar 2010-2012. Persikapen Diakonat Paroki SPM Kabanjahe 2012-2013; Penangkuhen Diakonat i Paroki Katedral Medan 26 April 2013; Paksa Diakonat i Paroki SPM Kabanjahe 2013-2014 ras si perpudi, Penangkuhen Malim ibas tanggal 19 Setember 2014 i Paroki SPM Kabanjahe.

      
Selamat man bandu malim  si mbaru RD Parlindungan Sinaga Pr, Tuhan si masu-masu ibas Imamatndu. Erbelangnalah pengelan kinirajan Dibata i doni enda arah pendahinppendahindu!

725 LASKAR MBARU KRISTUS I PAROKI BERASTAGI

PASTI PATRISIUS SITEPU,

Katekis Paroki Berastagi

Ibas Tahun enda, tahun 2014 Uskup Agung Medan Mgr.A.B Sinaga OFM.Cap rikutken ras jadwal visitasi-na reh ndahi umatna i Berastagi ras sekelewetna. Sue ras perarihenna ras DPPH paroki maka visitasi sekali enda iumputi pe alu pengendesen Sakramen Krisma man calon krismawan krismawati si erkiteken si e enggo iajari ras itegu-tegu arah pengajaren si ibabai pastor, katekis, guru agama bage pe pengurus Gereja.

Pengendesen Sakramen Krisma si iendesken uskup ibas perayan liturgi sakramen ibahan i rayon Kamerino, ringan i stasi Semangatgunung; i rayon Alverna ringan i stasi Tigajumpa-Sukajulu; i rayon San Damiano, ringan i stasi Sampun ras i rayon Asisi si ringan i Stasi Induk Berastagi. Kerina si ngaloken Sakramen Krisma e, rikutken pemereksaan kami tim katekis, lit buena 725 kalak.

Mehuli pe isingetken kami ijenda kerna kai antusen Sakramen Krisma e, bagenda: Sakramen Krisma lit ibas terpuk Sakramen Ininisasi raduken ras Sakramen Ekaristi bage pe sakramen si pertangtangna ialoken, eme Sakramen Peridin. Arah ngaloken teluna sakramen enda, bengket me sekalak jelma jadi anggota Gereja alu kuh. Arah peridin,  ipebengket kita jadi anggota Gereja; alu Krisma keanggotanta ipeteguhi; ras alu Ekaristi ipebelin kita ibas “Inkorporasi” alu ngaloken Kula ras Dareh Kristus jine. Guna nangkasken si telu si sada dalanen e, Gereja netapken, maka:guna ggaloken sakramen krisma arus leben ilakoken pelimbarui padan peridin; Wali krisma min seri ras wali peridin (KHK 893,2); ras Perayaan Sakramen Krisma iumputi alu perayaan Ekaristi si meriah alu komuni dua rupa nandangi si ngaloken krisma.

Alu pengampen tan uskup i cidahken maka Kesah Sibadia nusur ndemi kita, e me Kesah Sibadia si bali ras si ndube nusur ku babo rasul-rasul i bas wari Pentakosta. Jadi, buat sakramen Krisma e me Kesah Sibadia, si maba buah-buahna: reh serina ras Kristus; dewasa bas kiniteken; setia ngikuti Kristus; reh pangna mbela kiniteken; ipegeggehi jadi Saksi Kristus ras reh tambahna tanggung jawab nandangi Gereja si kerinana e, megari ikataken ibas sada perkatan: Jadi Laskar Kristus!  E maka rikutken ras 725 kalak i paroki Berastagi enggo ngaloken Krisma, e ertina enggo ka itangkuhken 725 kalak si mbaru jadi laskar Kristus.

Krisma e ilakoken i Rayon – rayon

Rayon si pemena idahi uskup e me rayon Kamerino inganna i stasi Semangatgunung bas tanggal 04 September 2014. Ingan pulung i Jambur kuta Semangat Gunung. Lit 144 kalak si ngaloken Krisma bas wari e. Gia erpagi-pagi nari nusur embun mekapal radukan udan gembura, la engkurangi keriahen ras ketunggungen lakon e. Alu landek pengalo-ngalo arah pernanden stasi Semangatgunung uskup i alo-alo bengket ku bas Jambur ingan lakon Krisma i lakoken. Tergejap tuhu-tuhu uga budaya Karo nambagi tunggungna lakon e. Si e teridah arah paken krina petugas liturgi si erpaken rose lengkap.

I rayon Alverna pe tempas lakon e narus bali ras i rayon Kamerino.  Eerpagi-pagi ibas kira-kira pukul 09.00 WIB, uskup si itemani P. Ignasius Simbolon, P. Moses Elias Situmorang ialo-alo umat i kerabangen gereja St. Yohannes Don Bosco Stasi Sukajulu-Tigajumpa. Protokol panitia Bp. Juna Sitepu ras Bp. Fonta Sembiring nehken kata pengalo-ngalo ras petangkasken maka stasi enda me stasi si pemena i Taneh Karo Simalem. Dung kata pengalo-ngalo iumputi alu pengalungen bunga man uskup ras vikep Jakobus Rasul Kabanjahe P. Ignasius Simbolon. Landek pengalo-ngalo ras alep-alep si meriah ngalo-ngalo dingen naruhken bapa uskup, vikep, pastor paroki ras kerina petugas liturgi si roseken paken adat Karo ku bas gereja. Pastor Moses Elias Situmorang i temani katekis paroki Berastagi bage pe pengurus Gereja mindoken man bapa Uskup maka enggo paksana calon si ngaloken Krisma enda ngaloken sakramen Krisma arah Bapa Uskup nari. Kerina erdalin alu mehuli bage pe perayaan Ekaristi irayaken alu meriah. I rayon enda lit 210 kalak si ngaloken sakramen Krisma. Enca dung man ciger ras ras umat, iumputi kata-kata sambuten ibas ketua panitia, pastor paroki, bage pe tim katekis paroki. Lakon e pe tambah riahna asum Bapa Uskup, vikep, ras pastor paroki rende trio Apenella, si erbahansa umat si enterem tuhu-tuhu nggejapken keriahen ras kemalemen ate.

I rayon San Damiano, Sakramen Krisma ilakoken i Stasi Sampun. Arah keterangen Ketua Rayon San Damiano, Sopianto Tarigan i rayon enda lit 175 kalak si ngaloken Krisma. Lakon e ibahan ibas tanggal 5 September 2014. I rayon Asisi lakon Sakramen Krisma ilakoken i gereja St. Fransiskus Asisi Berastagi tanggal 7 September 2014. Lit 196 kalak singaloken Krisma i rayon enda.

Bapa uskup arah kotbahna i kerina rayon, gelah si ngaloken Krisma, sekali Katolik tetap Katolik. Arus pang naksiken kinitekenna ras jadi saksi Kristus bas kegeluhen si teptep wari. La ketadingen pe isingetkenna uga enggo cedana negaranta Indonesia enda. Bapa Uskup ngataken si encedai negara gundari enda e me SMP (sex, Money, Power).

“Sex: uga gundari enterem anak-anakta singuda-nguda jadi barang dayan. Money: Lako ndatken erta-erta doni, jelma lanai mbiar nangko, korupsi ras si debanna. ras Power: Terpuk-terpuk si megegeh nindas si la megegeh, makeken gegehna alu cara si lapayo guna ngguntari ras erkuasa. Seh lit kalak si ngataken negaranta enda negara teroris!”,  bagem nina bapa Uskup alu sora si tangkas terang ras sora si erdolat.

“Ibas situasi si bagenda me kalak Katolik si enggo ipegegehi alu Kesah Sibadia ras iminaki jadi laskar Kristus ibas sakramen Krisma arus pang jadi saksi-saksi kebenaren ras pang mbela kiniteken ras Gereja desken sekalak tentera si la mbiar mate mbela negara ras rakyat si rulo!”, nina ka bapa si mulia e alu dem sumangat.

Mbera kai si isehken bapa Uskup enda, pegara api semangat ras kekelengen bagi si icidahken Kristus nandangi umat kekelengenna. Bagi si tersena arah das tulisen enda, eme buah ulih Krisma. Selamat ras mejuah-juah ngaloken sakramen Krisma. (PPS)