WALUH PULUH KALAK NGALOKEN KOMUNI SI PEMENA I KABANJAHE

Ibas wari Minggu, 22 Juni 2014 raduken wari raya kula ras dareh Kristus i Stasi induk, Paroki Petrus&Paulus si badi  Kabanjahe waluh puluh kalak anakta ngaloken komuni si pemena.  Sope denga ngaloken komuni si pemena enda, enggo ibahan seksi Katakese sepuluempat kali latihen .Enda ituriken seksi katakese Stasi Induk Paroki SPP, e me kap Ir Barita Manik (Bp Anna), Berta br Ginting SH(Nd Tiara), Njarumi Sinulingga (Bp Mangkok). Pelajaren si ni bereken e me kap: pengajaren umum Gereja, Hidup menggereja, Tata Lakon  Ekaristi Sibadi.

    

Ibas lkon e petugas liturgi pe anak-anak si nagaloken Komuni pemena. Ibas pemenan Lakon ituriken Malim Marianus Kedang, maka palas lakon enda e me kap Lakon man-man si badia si ni bahan Jesus ibas berngi ras ajar-ajarna sope denga Ia i endesken. Bage pe enjadiken keluarga Katolik. E maka i umputi alu pengendesen ku Malim, si wakili orang tua si anakna ngaloken komuni pemena, e me kap ibas keluarga Junias Bravo Tarigan(Bp Tiara) ras Berta br Ginting SH(Nd Tiara).

   

Lakon e , erdalan alu mehuli,  aminna petugas danak-danak si nampati pastor. Ibas lakon nuri-nuru maka i kataken Malim lit telu si penting ibas kegeluhen enda,  e me kap: si pemena tep-tep jelma perlu nakan. Tapi nggelu enda labo gelah man saja e maka arus seimbang nakan kula ras tendi.  Nakan tendi e me kap Kata Dibata.Nakan pertendin rehna ibas Lakon Ekaristi si badia, emaka iarapken kita banci ngukuru uga ertina lakon e; Sipeduaken e me kap Kiniersadan ibas lakon e. Erbage-bage jelma i pertibi enda tap maka banci ersada erkiteken kita i tenahken Tuhan Jesus.Iarapken danak- danak si enggo ngaloken komuni pemena enda ersada ras Jesus alu tutus ku Gereja. Sipeteluken Jesus enggo mereken dirina alu i paku i kayu persilang guna keselamatenta. Kita pe min banci mereken kekelengen man si deban. Labo alu erta saja tapi arah perbahanen pe banci ka. Enda terlebih i tengah-tengah jabu.

 Lit sada pengalamen nina,  ibas mulih ku Kabanjahe i Lau Simomo nari, erkiteken i perkuankenna kalak si nimai motor i pinggir dalan, e mAka kalak ndai enggo pang ngambati motorna gelah banci ikut nangkih ku datas. Enda enggo jadi sada penampat man kalak ndai. Dung Lakon e maka i umputi alu salam-salamen ras malim bage pe pengurus lingkungen,janah i bereken piagam man danak-danak si ngaloken komuni pemena.

    

Selamat ikataken kami man kam singaloken komuni pemena ras keluarga. Tutus ate ku Gereja gelah jadi anak-anak Dibata si patuh.Bujur ras mejuah-juah. 

H.Ginting/Bp Sulngam(Ralinggungi)

LAKON PERASMIN PELINDUNG PAROKI MARIA SI SOKELIAMEN I ANGKAT KU SURGA KABANJAHE

                                              

Lakon perasmin pelindung Paroki Maria si Sokeliamen i Angkat ku Surga, ilakoken ibas wari Sabtu, tanggal 21 Juni 2014 i lebe-lebe  pastoran Jalan Letnan Rata Perangin-angin Kabanjahe.  Lakon i benaken alu petangkasken kerna isi lakon s idur sekretaris panitia Marsel S.Tarigan S.Ag. nari. Dung si e ibahan toto  si ni babai malim Bernardus Sijabat Pr. E maka i umputi alu kata pengalo-ngalo ibas Ketua Dewan Rayon/Stasi Induk Drs Kawal Maha, Ketua Panitia Drs Caprilus Barus, malim Bernardus Sijabat Pr,Ketua DPP Ganti Kaban BA. Kai si ni peseh ibas kata pengalo-ngalo e me kap nina, maka umat ermeriah ukur arah lakon enda, semangat, njaga perseninan,i kut muat bagi ras banci mbaba kedamen. Iumputi ka ku mekpek bola volli ibas malim Barnardus Sijabat Pr.  Sope denga irasmiken,  maka lakon enda enggo i rancang Pastor Paroki, Pengurus DPP, Pengurus Stasi Induk ras pengurus lingkungen si lit i Kota Kabanjahe.  E maka leben  ipilih Panitia guna persikapen lakon e.  Runggu panitia i lakoken ibas wari Senin tanggal 9 Juni 2014. Sue ras percakapen i bas runggu e, maka i enggo terpilih si jadi panitia.

Perbapan Lingkungen Andreas ras Pilipus menaken pertandingen Volly  ibas lakon pelindung Paroki Maria si Sokeliamen i Angkat ku Surga Kabanjahe (Foto:H.Ginting)

Tampuk Lakon e sue ras si irancang ilakiken  ibas wari Minggu, tanggal 10 Agustus 2014.  Sope seh ku tampuk lakon e maka ibahan piga-piga perlomban ras pertandingen.  Pertandingen ras perlomban e me kap, Volly Perbapan ras pernanden, Tenis Meja perbapan ras pernanden, ersatur perbapan ras pernanden.  E maka ibas tampuk lakon e pagi i lakoken perlomban Koor, Vokal Grup perbapan, Duet Pasutri.

Panitia lakon pelindung Paroki Maria si Sokeliamen i Angkat ju Surga si enggo terpilih,  e me kap: Penasehat: malim Paroki Maria Si sokeliamen  Iangkat Kusurga; Dewan Pastoral Paroki (DPP)  ras Dewan Pastoral Stasi(DPS)/Rayon Kabanjahe ras si kundul ibas pengurus intin, eme: Ketua: Caprilus Barus (Ling.Firdaus); Wakil Ketua: Rengkut Ifinus Purba (Ling.Markus); Sekretaris: Marcel S.Tarigan (Ling.Bernadetta) ras Bendahara: Sarianta br Tarigan(Ling.Xaverius) bage pe Marheni br Sembiring (Bendahara Stasi).

Si erdahin lako nikapken kerinana si perlu rikutken ras seksi-seksina, eme: Seksi-Seksi Liturgi: Suster-Suster MRD Kabanjahe, diakon Parlin ras seksi Liturgi Stasi Induk Kabanjahe; seksi Ingan Pulung: Jonatan Tarigan(Ling.Elisabet) ras Madya Sebayang,Hesron Tarigan(Ling.Xaverius); seksi Olahraga: Ismail Sitepu (Ling. Gabriel); Ananias Sitepu (Ling. Johanes), Edy Win karo-Karo, Naksir Sinulingga (Ling. Antonius)                                                                                                                            ras Abner Simanjorang (Ling.Gabriel); seksi Festival Seni: Jan Iswadi Sembiring (Ling.Xaverius) ras Sarman Barus (Ling. Xaverius); seksi Sound System: Bp Oki Hutagalung (Ling. Josep) ras seksi Dekorasi: Suster-Suster MRD ras OMK Stasi Induk Kabanjahe.

Ikut pe muat bagin ibas seksi Acara: Harmonis Bukit (Ling.Stepanus); seksi Konsumsi: Tiran br Karo (Ling.Monika) ras PPK Stasi Induk. Seksi Hadiah: Rosita br Sianipar ( Ling. Nikodemus); seksi Kesehatan: Nikodemus Ginting (Ling.Monika) seksi Dana: Ketua-Ketua Lingkungen i Stasi Induk; seksi Lelang: Swingli Sitepu, Waji Ginting, Sabarita br Tarigan ras Marheni br Ginting,Harmonis Bukit bage pe seksi Dokumentasi: Terbit Barus.

Arah lakon enda pe maka i arapken kini ersadan umat i Stasi Induk Kabanjahe, erpaguhna janah maba keriahen.

Selamat erlumba ras ertanding man kerina peserta. Ijaga perseninan ras ula lit si rubat-rubat bage pe tama ku pusuh adi lit iakap la payo. Bujur ras mejuah-juah.

Bp Sulngam/Ralinggungi

REKOLEKSI LINGKUNGEN LUKAS STASI INDUK KABANJAHE

Ibas wari Kamis , tanggal 29 Mei 2014 tupung Wari Raya Kenangkihen Tuhan Jesus ku surga, umat lingkungen Lukas, stasi Induk Paroki Maria si sokelimen Kabanjahe ngelakoken rekoleksi i kapel berita simeriah San Damiano, Jaranguda Berastagi.  Rekoleksi enda enggo irancang pengurus ras umat lingkungen Lukas. Buena umat si ikut kira-kira 40 kalak. Berkat i Kabanjahe nari ku Sapo malem,J aranguda nangkih 3 angkot Kama. Seh ku ingan lakon e, i alo-alo pastor Agustinus Yew OFM Cap alu meriah ukur.

   

Lakon ibenakan jam 09.30 seh ngasa jam 16.30 karaben . Ibas lakon e, pastor Agustinus nuriken maka kalak si ramah Jesus , usur mereken kesaksin.Ibas kekeken Tuhan Jesus e me kejadin tampuk si mbelin. Arah kesaksin enda maka lit kejeran. Ibas kegeluhenta maka kita iarapken usur ngalokken ras mereken. Ula ngaloken saja ngenca. Bagi Maria Magdalena si enggo i pepalem Jesus , ia jera ras mereken kesaksin, maka kita pe jera ibas lagu langkah si la ngena ate Tuhan. Tabiat-tabiat si la mehuli maka min itadingken.

  

 Ibas lakon e, ibahan ka lakon Adorasi. Piga-piga si ikut ngatakensa maka lakon enda tuhu-tuhu maba sada kedamen ku pusuh janah ngejapken perkuah ate Dibata bage pe ngukuri perbahanen-perbahanen sedekah enda si la payo akap manusia ras Tuhan.

   

 Ibas pendungi , erbelas arah pernanden ngatken e me kap  Nd Ivo br Pandia kesan-kesan ras pengataken bujur man malim Agustinus, bage pe ikut erbelas Ketua lingkungen Lukas Bp Ina Dafrasa Tarigan. Lakon si bagenda rupana i rancang lingkungen Lukas gelah ibas ku pudi wari enda pe pagi,i bahan ka ulihi ibas waktu si deban.

Bp Sulngam  Ginting/Ralinggungi

LAKON MARIA CUP SI PELIMAKEN STASI KANDIBATA MERIAH, ERBOLO-BOLOKEN TENAH: “JADILAH I BAS AKU BAGI SI ENGGO IKATAKENNDU E”

Lakon Maria Cup pe limaken tahun 2014 i Stasi Kandibata,Rayon Kacaribu Paroki ST Petrus&Paulus Kabanjahe erdalan alu dem keriahen. Thema si ni bahan ibas lakon e, e me kap: Jadilah i bas Aku bagi si enggo ikatakenNdu e (Lukas 1:39).  Lakon i bahan i loosd Kuta Kandibata ibas wari Kamis,tanggal 29 Mei 2014 rembang raduken lakon wari raya kenangkihen Tuhan Jesus ku Surga.  Lakon e, enggo i rancang ibas Stasi Kandibata janah enggo terpilih panitia sope denga ibahan lakon e.

    

Panitia lakon Maria Cup Stasi Kandibata ibas tahun 2014 enda, e me kap , Ketua: Nd Felix br Purba, Sekretaris : Nd Mika br Sinuraya, Bendehara : Nd Kenari br Perangin-angin.Lakon ibenaken ibas Gereja Katolik nari Stasi Kandibata. Umat ngarakken Malim RD Marianus Gilo Kedang Pr ras Fr Tugas Ginting OFM Conv.,berkat ku Loosd Stasi Kandibata. Emaka i umputi ku lakon Ekaristi Sibadia.

    

Dung lakon Ekaristi Sibadia i umputi alu kata pengalo-ngalo ibas Panitia,Malim bage pe Vorhanger Stasi Kandibata. Janah la ketadingen hiburen ibas Jani Sembiring bage pe Retno Pelawi. Emaka iterusken ku lakon perlomban. Ibas lakon Maria Cup tahun 2014 enda maka tambah buena perlomban si ni lakoken. Arah penambahen perlomban e, maka iarapken umat erteremna ikut muat bagin.

   

Dung kenca perlomban, maka juri ermomo ,lingkungen ise saja si jadi juara.

Lit pe Juara-juara ibas pertandingen ras  perlomban, e me kap: ibas Bola Volly perbapan: Juara 1: Lingkungen St Xaverius; Juara 2: Lingkungen St Josep; Juara 3: Lingkungen  St Elisabet; Juara arapen 1: Lingkungen St Maria.Juara ibas pertandingen Bola Volly Pernanden, eme: Juara 1: Lingkungen St Elisabet; Juara 2: Lingkungen St Petrus; Juara 3: Lingkungen St Josep; ras Juara arapen 1:  Lingkungen St Monika.

Iban pe piga-piga perlumban lako erbahan pesta e meriah rikutken ras perlumban-perlumban buaya. Ibas perlumban Njujung lau alu botol Aqua (Perbapan) eme: Juara 1: Lingkungen St Monika; Juara 2: Lingkungen St Theresia; Juara 3: Lingkungen St Elisabet ras Juara arapen 1: Lingkungen St Johanes. Pertandingen Mbaba guli alu sendok (perbapan), eme: Juara 1: Lingkungen St Petrus; Juara 2: Lingkungen St Maria; Juara 3: Lingkungen St Josep ras Juara arapen 1: Lingkungen Johanes. Ibas pertandingen  Mbuat karet bas piring alu pipet (pernanden) juara-juarana, eme: Juara 1: Lingkungen St Monika; Juara 2: Lingkungen Elisabet; Juara 3: Lingkungen Josep ras Juara arapen 1: Lingkungen St Petrus. Bola ria pernanden:, juara-juarana eme: Juara 1: Lingkungen St Petrus; Juara 2: Lingkungen St Elisabet; Juara 3: Lingkungen St Josep ras Juara arapen 1: Linkungen Monika

Ibas pertandingen-pertandingen si debanna, e me Kuis, Juara 1: Lingkungen St Elisabet; Juara 2: Lingkungen St Josep; Juara 3: Lingkungan St Petrus  ras Juara arapen 1: Lingkungen St Johanes;  Puisi Perbapan, Juara 1: Lingkungen St Johanes; Juara 2 : Lingkunge St Petrus; Juara 3 : Lingkungen St Monika  ras .Juara arapen 1: Lingkungen Josep. Ibas Ngerangke bunga (perbapan) si juara eme: Juara 1: Lingkungen St Petrus; Juara 2: Lingkungen St Elisabet; Juara 3: Lingkungen St Josep ras Juara arapen 1: Lingkungen St Petrus. Ibas Tari persembahen si menang eme: Juara 1: Lingkungen St Johanes; Juara 2: Lingkungen St Josep; Juara 3: Lingkungen St Teresia ras Juara arapen 1: Lingkungen St Elisabet.

Juara Vokal Grup ibas lakon e, eme: Juara 1: Lingkungen St Josep; Juara 2: Lingkungen St Johenes; Juara 3: Lingkungen St Elisabet  ras Juara arapen 1: Lingkungen St Petrus . e maka, si jadi juara umum , e me kap: Lingkungen Elisabet.

   H.Ginting ras Repanta Ginting / Ralinggungi