R.P. IGNATIUS SIMBOLON, OFM CAP: “PERAYAN JUBILEUM JADI PAKSANTA ERCURMIN RAS ERKATA BUJUR”

BETLEHEM KETAREN, BERASTAGI

Missa perayan Jubileum 75 tahun Gereja Katolik i Taneh Karo Simalem ras Paska Perbapan Paroki St. Fransiskus Asisi Berastagi i Jambur Sukajulu ibas tanggal  11 Mei 2014 erdalan meriah, sikap, erlayas, metunggung dingen mehaga.

Perayan e ibabai 4 pastor, eme: P. Moses Elias Situmorang, OFMCap, R.P. Ignatius Simbolon, OFM Cap, P. Leo Joosten Ginting, OFMCap ras P. Albinus Ginting, OFMCap, si banci ikataken jadi tanda 4 palas peringeten ras perayan Jubileum e, sabap erkiteken ibas 4 pastor e kuh bilangen ras pulungen “tawar”Jubileum, eme: ije lit si natang layar-layar keuskupen (vikep); si natang layar-layar paroki (parochus); missionaris si tading arah pudi; si jadi tanda buah Gereja i taneh Karo (pastor si nitubuhken ras erpusungken si ndabuh i Taneh Karo Simalem).

“Lit  piga-piga si man germetennta ibas perjumpanta si mehaga enda, e me: Erkata bujur man Dibata, Ercurmin kerna kinitekenta bas 75 tahun enggo Gerejanta uga kita ras keke ku kegeluhen si mbaru rikutken ras kekeken Kristus.”, nina R.P. Ignatius Simbolon menaken cakapna ibas Nuri-nuri.

“Semalna bagi kita nuan-nuan, adi mehumur tanehna, mehuli benih si nisuanken ras mehuli pengarak-ngaraken maka mehuli mburnis me si man peranin. Tuhu, arah pengalamen pastor-pastor si arah lebe tupung ia ngerungkah, labo mis kal inanamina buah si nisuanna e. Mekatep kap gereja paksa e, buka tutup: buka sada tahun tutup dua tahun. Lit pastor si bengket pe ku tutupen ras piga-piga ia sakit mekatep erkiteken melalasa si man dadapen tapi kurang alat perkakasna.”, nina ka neruskenca.

Kurang lebih 1.800 kalak si pulung i Loosd Sukajulu e, subuk perbapan, pernanden, mudika tah pe lit ka anak-anak, teridah tutus megiken cakap pastor e. Pastor Ignatius jine alu erbulang-bulang, kadang-kadangen bage pe ras selempang si nipakena teridah tuhu-tuhu erdaulat nehken katana.

“Anem bage, alu toto ras pengendesen dirina tikutken ras penguen umat, ibas 25 tahun si perpudi enda pertambahen bilangen umat  tuhu-tuhu njengangken, gereja tambah, ras erkiteken si e paroki pe tambah ka.

Paroki tambah bage pe kininggiten ikut muat bagin ibas pendilon religius pe tambah. E maka enggo nterem genduari kalak Karo jadi pastor, suster tah pe bruder. Kinata si  la terbuali, ras sieteh pe ras-ras maka P. Emmanuel Sembiring, OFM Cap i Stasi Bawang nari enggo 2 periode minpin kami kapusin. Sekolah katolik bage pe asramana ertambah-tambah ka. Credit Union si ndube lit arah penuan Gereja Katolik pe enggo lit menam-menam i teptep stasi.”, nina ka R.P. Ignatius nerusken cakapna.

“Arah lakon perayan Jubileum 75 tahun Gereja Katolok i Taneh Karo rikut ras perayan Paska Perbapan se paroki St. Fransiskus Asisi Berastagi si ilakonken kita sendah, iarapken maka kam kerina jadi umat si ermeriah ukur ras la lupa ngataken bujur sabap rutang kap kita man Dibata ibas pemerena si la la teralang belinna. Patut pe kita ngataken bujur man missionaris si enggo ngerentis dalan dingen ngerungkah lako pebelangken Kata Dibata. Seakatan si e, perlu kal kita ercurmin kerna paksa-paksa perdalinen pemanteken Gereja i Taneh Karo enda rikut ras perkembangenna seh asa genduari enggo 75 tahun umurna. Arah pengalamen kita ngaluri paksa-paksa e, kuakap genduari lanai bo kita perlu mengayak kal ngejar bue bilangen tapi paksana kita perlu kal ngejar peningkaten “mutu” kekatoloken alu ningkatken “sencus catholicus”. Alu bage lanai bo si bere sisa-sisa man Gereja, subuk sisa waktu, sisa gegeh tah pe sisa pemeteh, tapi nggit ras meriah ukur kita mere kai kin arusna si patut si bere kempak Tuhan erkelangken GerejaNa!”, nina ka pastor e.

“Uga kin caranta pebelin kiniulin kerna “sencus catholicus e? Guna si e, perlu sipegeluh rusur semangat peridinta, keke kita ngikutken kekeken Kristus ras erpengendes man Dibata ras sisikapkenlah tading-tadingen man sinursurta e me tading-tadingen kiniteken alu ngajar-ngajari anak tah kempu-kemputa ertoto dingen ngelakoken kesemalen-kesemalen kinikatoliken!” nina P. Ignatius ibas pendungi katana.

Ibas perayan Ekaristi e jine isisipken pekata gung Jubileum, si ilakoken 5 kalak rikutken pengiahken P. Moses Elias Situmorang, eme: P. Leo Joosten Ginting, OFMCap ngewakili kerina miisonaris si enggo ngerungkah ras ngerentis dalan pebelangken Berita Simeriah i Taneh Kari; P. Ignatius Simbolon, OFMCap ngewakili uskup; P. Moses Elias Situmorang, OFMCap ngewakili umat se paroki; Samiandri Tarigan ngewakili stasi Sukajulu, stasi si pemena ipanteki ras Pasti Patrisius Sitepu, ngewakili kerina serayan si latih la tampil latih nikapken lakon perayan e.

Nina P. Moses Elias, seakatan lit lako jabat si ibaba si pekata gung e, mehui ka nge adi siantusken limana ia ngewakili Merga Silima, e me merga-merga kalak Karo.

Lakon Tambahen

Dung kenca perayan ekaristi, piga-piga kegiaten minter ilakoken e me perlumbaab kuiz bage pe kata-kata sambuten. Kenca si e ibahan man ras-ras.

“Asa si kuidahna enda denga kita ibas man ras-ras ibas perayan Gereja erdalan alu seh kal sikapna!” nina Senen Tarigan i Siberteng nari.

“La ndekahsa ielai ras tepat pukul sada kita enggo ndahup, padahal jelma seh kal teremna subuk i Jambur bagepe iluarna”, nina ka temanna ngumputisa.

Dung man ibahan ka perlumbaan koor gabungen bage pe per Vocal Group perbapan. Panitia teridah begermet nikapken kerinana maka sora si rende subuk ibas koor bage pe ibas vocal group terbegi ku kerina ingan subuk i Jambur bage pe i luarna. Pembagin-pembagin hadiah pe ibahan perterpuk jadi selingen ibas kelang-kelang perlumban erbahan lit lalap si man timanken.

Teridah maka kerinana si iban panitia alu sikap e maba ulih si mehuli, e umat la si lawes-lawes seh iak lakon perayan e itutup alu pertoton ibas pukul 18.40, ras kenca si e umat manjar-anjar mulih ku kutana sekalak-sekalak alu maba keriahen ukur, bage pe maba hadiah-hadiah, man kontingen-kontingen si menang ibas perlumban-perlumban e.

PERASMIN KUASI PAROKI ST. MONIKA TIGANDERKET

P. LIBERIUS SIHOM-BING, OFMCAP.

Perayan perasmin Kuasi Paroki St. Monika Tiganderket enggo ilakoken ras lakonna erdalan alu erlayas ras meriah, ibas Minggu 25 Mei 2014. Mgr. Anicetus Sinaga, OFMCap langsung minpin perayan, si ibenaken alu pemasu-masun rumah pastoran provisoris (rikutken penggelaren Bp Uskup: pastoran sementara).

Ritus pemasu-masun pastoran si igunaken pe jadi kantor paroki e ibahan alu singkat (i luar acara liturgi ekaristi) jenari iterusken ku pemasu-masun tabernakel paroki i bas gereja. Kenca si e uskup, malim ras rombongen erdalin nuju rumah Ketua Dewan Pastoral Paroki (Bp. Jun Martin Ginting) si labo ndauh i pastoran e guna erbahan persikapen alu makeken paken misa. Asum serayan liturgi rose, umat nimai i kesain gelah ibas lakon peraraken. Sada motor pick up sengaja pe  isikapken maba si erjabaten i stasi Suka nari (Raloling) ngarakken kerinana berkat ku losd kuta Tanjung Merawa, si dauhna kurang lebih 400m i rumah e nari.

Lit 10 kalak malim konselebran muat bagin ibas misa Inaugurasi e ngarakken i Bp Uskup. (P. Ignatius Simbolon, OFMCap; P. Emmanuel Sembiring. OFMCap; P. Liberius Sihombing, OFMCap; P. Lister Tamba. OFMCap, P. Marianus Kedang, Pr; P. Cesarius, Pe;  P. Elio Sihombing, OFMCap, P. Mikhael Hutabarat, OFMCap; P. Alfonsus Anam, ras P. Rudianto Sitanggang, Pr). Ras kenca dung Ekaristi, P. Donatus Marbun reh ndapeti kenca ia maba misa i sada stasi i Kabanjahe.

Umat paroki pe tangkas teridah enterem reh subuk si enggo tading i kutana sekalak-sekalak bage pe si ringan denga i pengungsin (lit 3 stasi idur 13 stasi lit dengan i posko pengungsi erkiteken deleng Sinabun mbeltuk). Ibas perencanan itaksir kami umat si reh terjeng 600-700 kalak, ttapi ibas kinatana umat si reh lebih 1000 kalak. Si enda jadi mungkin erkiteken perayan inaugurasi e igandengken ras Minggu Gembira Anak (ras guna si e iban kuis ras tari-tarian) e maka anak-anak pe pulung raduken ras orangtuana.
Piga-piga pengkuhi acara rikutken ras perasmian paroki e isisipken ibas perayan Ekaristi, eme:
1. Pelantiken DPP si mbaru guna jangka waktu 1 thn, bage pe Dewan Rayon siilakoken Bp. Uskup Agung Medan, Mgr. Anicetus Sinaga;
2. Pengogen Surat Keputusan Uskup kerna Perasmian Kuasi Paroki St. Monika Tiganderket ras pastpr-pastor si ertugas i paroki si mbaru, si ilakoken Vikep Kabanjahe.
3. Pekata gung 3 kali si ilakoken Bp. Uskup si jadi tanda perasmian paroki si mbaru e.
4. Pengendesen penjayon idur paroki SPP Jl. Irian nari kempak Kuasiparoki St. Monika Tiganderket si ilakoken P. Marianus Kedang ras P. Cesarius;
5. Pengendesen buku-buku stambuk paroki idur paroki SPP, si enggo erlayar idahiken aron si ijemba-jemba paroki SPP bage pe kuasiparoki Tiganderket;
5. Pengogen Piagam (berisi Berita Acara) perasmian paroki idur Keuskupen si ilakoken pastor paroki Marianus Kedang.

Kerinana acara e erdalan alu erlayas ras metunggung. Tergejap pe tambah-tambah riahna ras si bagi tanda dukungen pertendin kempak pastor ras umat paroki Tiganderket alu rehna enterem pastor ibas perayaan inagurasi e. Tentuna, kerina bagin-bagin acara e jadi sada jadi  cara evangelisasi si meuli man kerina jelma si tading i sekelewet paroki Tiganderket. Mbera-mbera kai si enggo ibenaken alu mehuli ibas wari e, terus nggeluh mehuli seh erbuahken buah-buah kiniulin subuk man Dibata, Gereja bage pe man jelma si enterem.


Bujur melala isehken kami arah pusuh kami si mbagesna man bandu kerina si reh ku perayan e bage pe si reh ibas toto-toto ras kata tenahndu. Meriah kal ukur kami sabap teh kami arah totonta kerina ibegiken Dibata, kai si ibiarken kami ndekah menda (piga-piga kali lakon perasmian paroki icuncun erkiteken perbeltuk deleng sinabun) dungna ipedauh Dibata raduken ras ibereNa man banta kejuah-juahen raduken sangap. Mejuah-juah.

BUDIUTOMO SEMBIRING ras JAPET SURBAKTI, JUARA NULIS IBAS CAKAP KARO

BETLEHEM KETAREN, BERASTAGI

    

Sue ras si imomoken ibas majalah Ralinggungi Edisi 13 Tahun II April 2014, Majalah Ralinggungi ras Panitia Syukuran Jubileum75 tahun Gereja Katolik i Taneh Karo - Paska Perbapan Paroki Berastagi erbahan Lomba Karya Tulis lako peturahken penggermeten umat si rulo kerna kiniliten ras kinata Gereja Katolik i Taneh Karo.

Rikutken ras tema, paksa ras sarat-sarat si deban ras rikutken paksa si itentuken maka lit buena 11 tulisen si seh ku meja juri, eme: Japet Stepanus Surbakti (Merdeka:“Mbelang Taneh Siman Peranin Sitik Sindahisa”, 5 Halamen, Ketik, Cakap Karo); Terpal Barus (St. Andreas Berastagi: “Ermegah Ate Jadi Kalak Katolik”, 5 Halamen, Ketik, Cakap Karo); Josep Robinson Bangun (St. Theresia Avilla Raya:“Mbelang Si man Peranin, Kurang Si Ranisa, 8 Halamen, Ketik, Cakap Karo); Budiutomo Sembiring (Emanuel Berastagi: “Ermegah Ate Jadi Kalak Katolik” , 6 Halamen Ketik, Cakap Karo); Tarida Br. Manik (St. Xaverius Barusjahe: “Megah Ate Jadi Katolik, 5 Halamen, Ketik, Cakap Karo); Paham Sitepu (St. Yohanes D.B. Sukajulu: “Bangga Sebagai Orang Katolik”, 10 Halamen, Tulis Tan; Bahasa Indonesia); La Tersena Gelarna (Ajijulu “Mbelang Kap Man Peranin Tapi Kurang Siranisa”, 5 Halamen, Tulis Tan, Cakap Karo); Ngalemisa Br. Ginting (St. Elisabeth Berastagi:“Aku Bangga Jadi Orang Katolik”, 7 Halamen, Ketik, Bahasa Indonesia); Mastia Br. Simajuntak   (St. Elisabeth Berastagi:“Bangga Menjadi Orang Katolik”, 5 Halamen, Ketik, Bahasa Indonesia); Titik Noni Br. Sitepu, ST (St. Markus Beras-tagi:“Bangga Menjadi OrangKatolik”, 6 Halaman, Ketik, Bahasa Indonesia); ras Lusianna Meliala, S.H. M.Hum, (St. Petrus Berastagi: “Mbelang Simenperanin Tapi Sitik Siperanisa, 5 Halamen, Ketik, Bahasa Indonesia).

Rikut ras si igejapken P. Moses Elias Situmorang, OFMCap selaku si njemba ibahan perlumbaan enda bage pe selaku koordinator juri, maka lumba nulis seh kal pentingna sabap em sada dalan ngadepi jaman si genduari, maka kerina si tulisenna masuk ibere hadiah penghargan.

“Subuk si ngikutken sarat bage pe si lang arus si bere penghargan sabap kininggitenna e perlu ipuji”, nina P. Moses.

Lit pe torosen juara-juara nulis Cakap Karo e, sue ras data si ipindo kami arah dewan juri, eme: Juara Pertama: Budiutomo Sembiring; Juara Dua: Japet S. Surbakti; Juara Telu: Josep Robinson Bangun; Juara Arapen I: Terpal Barus;    Juara Arapen II: Tarida Br. Manik; Arapen III: La Tersena Gelarna; ras si debanna dat penghargan.

Kerina si menang teridah cahar ayona ngaloken erbage-bage hadiah si iendesken panitia, rikutken ras arapen si erban perlumban, maka si enggo menang e  la erleja-leja erlajar ras gelah tetap ergiah-giah erbahan tulisenna subuk i Majalah Ralinggungi bage pe ibas ingan si deban.