ENGKAI RAS UGA YOUCAT BAS CAKAP KARO

Ibas edisi Desember, Redaksi Menjemaat ngeliput profil Betlehem Ketaren (sekalak bas tim penerjemah Youcat Karo) guna rubrik “Apa & Siapa” bas majalah e, rubungen ras uga ras engkai, bapa empat anak e muat bagin bas tim penerjemah katekismus populer YOUCAT ku bahasa Karo. Uga pengalamen ras ambaten-ambaten si iadepina? Adi ibas Menjemaat isuratken versi gendekna, i jenda isuratken kami versi si gedang.

Ananta Bangun: “Mbaru-mbaru enda ibegi kami enggo terbit Youcat bas cakap Karo ras ieteh kami ka kam ikut muat bagin nerjemahken kitap e. Banci turikenndu man kami kerna si e?”

Betlehem Ketaren: Ngerana kerna uga ras engkai aku ikut muat bagin bas penerjemahen Youcat ku cakap Karo, si enda jadi rubungen ras pendahin si metahat RP. Ignatius Simbolon, OFMCap., bas ngaturken kalak si iakapna banci nampati ia bas nehken katakese bas erbage kesempaten. Si enda ibenakenna tupung ia ngalo-ngalo kami alumni Sekolah Porhanger gelombang pertama, ras sanga e ia pastor paroki Berastagi denga. Iteruskenna pe mbekali katekis e alu erbahan perjumpan erketerusen teptep bulan ras nuruhsa er- Emaus  dua-dua ku stasi guna nehken pengajaran persikapen sakramen-sakramen bage pe erbahan evaluasi-evaluasi ras-ras kenca teptep sakramen enggo ialoken.

Isi Stasi megati katekis e ngadepi kesuliten sabap la umat ngenca, pengurus pe megati bas megi-megi perkatan, bagi: koinonia, kerygma, liturgya, diakonia, martyria ras pe, lumen gentium, familiaris consortio ras si debanna, jengang tempa megi bahasa roh tah pe cakap i planet si deban nari. Bage pe ka tupung ikataken kami maka kalak si erjabu dua perlu pesikap jabuna alu ngajuken libellus ku Tribunal ras ula lebe ngaloken komuni ras seterusna, erkiteken si e iakapna kami pejago-jagoken ras alu melukah ka umat tah pe iarakken pengurus “naik banding” subuk ku umat si deban, ku pastor paroki bage pe vikep. Ngidah si bage rupana, RP. Ignatius Simbolon nehken penjembaan man ”temanna sada tegun” (bage nina rusur) lako nikapken kitap-kitap umat, si terlebih iarapken jadi bahan pengajaren guna kalak si peridiken tah pe ialoken dewasa, ras ibahan bas cakap Karo, gelah arah iogeken saja pe enggo tentu nambahi pemeteh kerna ajaren Katolik.

Ananta Bangun: “Lit nge ambaten tah pe ganjalen si mberat bas nerjemahken bage pe ngelitken Youcat e ku cakap Karo?”

Betlehem Ketaren: Sope nerjemahken Youcat, Katekismus Populer ku cakap Karo, arah pengaturen RP. Ignatius Simbolon, OFMCap., enggo leben iterjemahken kami Katekismus Kecil “Damai Bagimu jadi “Mejuah-juah man Bandu, Katekismus Katolik alu 242 sungkun-jabap. Bas tahun 2011 buku e icetak 1.000  arah penampat Komisi Evangelisasi KAM ras pernah ka icetak ulang edisi peduaken 1.000 buku nari.

Youcat Karo, si “asalina” irangke Paus (EM) Benediktus XVI bas bahasa Jerman, iterjemahkan idur Youcat Indonesia, risiken 527 sungkun-jabap si iumputi alu referensi KHK lengkap ras mbages pengantusenna. Ndahiken penerjemahen enda perlu empat tahun dekahna, ija ibenaken ndube bas tahun 2014, ras terbit bas 2018. Aron si ndahiken dahinna enda tupung ibentuk lit 12 kalak anggotana, ras rikutken perdalanen waktu erkurang jadi 7. Guna “ngalisi si perpudina” dahin enda idahiken terpuk kitik saja, lit 4 kalak si ndahikensa, tambah RP. Ignatius Simbolon, OFMCap si la pernah ketadingen bage pe RP. Albinus Ginting, OFMCap. si reh ka kune lit waktuna guna mereken telah-telah bage pe semangat man anggota tim.

Aku jine meriah kal ukurku ibere dahin lako ngaturken anggota bage pe dahin tim. Ras nginget penampat isehken pribadi-pribadi si kuhamati bagi RP. Leo Sipahutar OFMCap, si nehken foto-totona asa bue si kupindo guna petunggungken buku enda, si enda tuhu-tuhu megah kal kuakap. La ketadingen ka pe si kukelengi OMK si bereken dokumentasina bas ia ergereja. Saja ngenca la kerina gambar-gambar enda mbanci masuk, sabap nina penerbit, secara merambo-rambo tetap arus bali min kitap enda ras kitap si iterjemahken. Tapi asa litna pe gambar si enggo masuk, adi nina pastor Ignatius enggo ncidahken buku enda khas Karo. Maka bas perjumpan kami si pemena kenca buku enda terbit mis aku isalamina dingenna nina: “Kam enggo lulus, pa!” (La banci kal kupegedang bas dampar kai siimaksudkenna, sabap perkatan e ibelaskenna tupung rapat kevikepan sangana erdalan).

Pengalamenku ngikut-ngkut bas tim Missale Rowawi Karo sedekah waluh tahun perpudi enda,  tentu lit ka nge ngaruhna lako pelancar penerjemahen enda, gia maun-maun erkiteken si e banci ka kami kentisik-kentisik “petembal” bas ndarami perkatan-perkatan si tepat. Kuakap bangku enggo nandai “tendi” si icakapken ras teman-teman pe ipertahankenna ka rikutken ras “cita rasa” si igejapkenna. Adi enggo bage jadi, biasana pastor Ignatius tenang-tenang megiken “perubaten” kami, ras ngarahken dingen pe njemba semangat kami subuk arak katekese si gendek bage pe arahPerayaan Ekaristi si si ielaina guna tim enda. Sung-sung ibabana ka kami gawah-gawah guna pekesahken dingen pegiaheken semangat persima-siman sisada aron pendahin.

Mereken diri telu wari dua berngi teptep bulan guna pendahin enda man kami si bas jabu pe melala ka keperlun-keperlun si man pesikapen tentu la melukah. Banci kubayangken teptep mulih ayo kami kerina iadepen jabu kami, rikutken luah si ibaba kami:  uis si enggo melket rikut ayo pe ringut ban latihna. Langa ka pepagina pe enggo ka terbayang arus ndahiken dahin si lolo subuk i juma man kami si ku juma bage pe i sekaolah nandangi teman-teman si guru, i ja kula ras ukur situhuna enggo perlu refresh alu pekesahken. Engkai maka banci kubayangken ningku, sabap aku jine pe ngenanamisa uga. He he he..

Ibas tegun si mada dahin pe idah kami ka nge tangkas litna tentangen si inanami RP. Ignas Simbolon., OFMCap. Teptep bulan arus idaramina ingan kami jumpa ras erdahin si sikap ras murah ras adi banci la nggalar. Maun-maun la kenca datca, itawai kami ka man kami, alu perkatan: “kerina tinepa Dibata lit nge inganna ngamparken takalna, tapi kita sendah kepe la lit.” Lit kin nge ingan si sikap tapi murah genduari enda? Lit ras idat pastor e nge rusur. Maun kami erdahin i villa umat, i rumah-tumah tumpangen ras pernah ka pe i rumah Karo si la iingani, i Sukajulu, bage pe i ingan-ingan si deban. Janah,a maun-maun mentas ka nge penungkunen bas pusuh kami: i ja nari nge rusur idat pastor enda penukur nakan kami bage pe pemerena guna ongkos kami mulih ala kadarna gia? Tentu uga pe erkiteken dahin enda, menipes me sen gelemenna teptep bulan, bage pe maun si idatna maun arah pemere kalak si melumbar man bana, si kerinana e ipersembahken pastor e guna nambahi pemeteh ras kiniteken umat si ercakap Karo,  dingen pe guna miara cakap Karo e gelah ula min sempat bene!

Tupung pendahin penerjemahen nandangi dung, ersada arih kami ras-ras ndarami donatur guna biaya percetakan buena Rp. 28.000.000 ras sitik pengataken bujur nandangi kinilatihen tim. Si enda pe ibahan gelah bas paksana pagi buku e idayaken alu murah meriah saja. Sabap tangkas kal nge man kami maka langa bo mbages kininggiten umat nukur buku, kecuali iarusken. Isuruh pastor Ignatius me aku erbahan 50 proposal guna isehken man kurang lebih 50 donatur subuk pribadi bage pe lembaga-lembaga si niakap kin pe lit kengasupenna nampati. Tupung seh paksana nungkir rekening bank, kepeken sekalak ngenca si masuk penampatna, ibas gelar Asli Purba, i Berastagi.

Rikutken perdalanan paksa, Vikaris Episkopalis St. Yakobus Rasul Kabanjahe lit bas periodesasi,  i lebe-lebe Vikaris Jenderal RP. Elias Sembiring, OFMCap., isehken RP. Ignatius Simbolon pendahin si lolo e kempak si ngantiken ia RP. Karolus Sembiring, OFMCap ibas katana sengkebabah dua, bage pe ibas memorandumna. Meriah ukur pastor Karolus ngalokensa ras minter ka iberena bangku tugas erbahan proposal ku Reksa Subsisdi KAM. Bas piga-piga jam, erkiteken semangat si ergiah-giah enggo kuban dung proposal e bage pe erbahan stempel Tim Penerjemah ras la ketadingen ngganti” stempel  vikariat si rempet ka lanai idah.

Mulih kenca pastor Karolus bas berngina i rapat Reksa Subsidi nari , mis ka ipebetehkenna bangku, proposal bantuan tah pe tepatna pinjamen biaya cetak Youcat Karo “dikabulkan sepenuhnya”. Masalahna, kenca cair bantuan e ras isehken ku peberbit, ikatakenna maka cetak 1.000 buku buena 48 juta labo 28 juta. Sempat pe tumpat ukurku ras kisat aku rubungen ras penerbit. Tapi kenca jumpa ras pastor Karolus bage pe pastor Ignatius, minter ka aku isemangatina. “Ula gara-gara sen maka dahin enda lolo. Ja nari pe banci nge kari reh sen tambahenna”, nina Pastor Karolus. Ras, “Sayang kal adi dahinta si enggo dung e, la sempat icetak. Padahal adi icetak buku e penting kal ras jadi peringeten man sinursur ku sinursur maka enggo pernah kita erperbahanen mehuli ras lit pengkebetta!” nina ka RP. Ignatius Simbolon mere semangat alu carana jine.  Maka bagem ka kubangun komunikas ras penerbit ras la ndekahsa minter buku e seh i Berastagi ras ibagiken ku paroki-paroki alu lit denga utang ku penerbit buena Rp. 22.100.000, termasuk biaya pengirimenna. (Sanga tulisen enda kusuratken enggo ilunasi, ula kari mbiar si ngogesa).

Bas sada perjumpan si ibahan Komisi Kateketik i Siantar, pernah kulaporken maka sada perogram katakese i vikariat Kabanjahe emkap nerjemahken Youcat ku cakap Karo. Ketua Komisi Kateketik RP. Oktavianus Situngkungkir, OFMCap, bas paksa pekesahken ngataken bangku maka meriah kal ukurna megi pendahin e ibahan. Ras iingetkenna ka gelah bangku maka i KAM sudah enggo lit pastor si itetapken niksiki bahan cetakan ras mere Nihil Obstat-na, ras kepeken man si ercakap Karoa, pastorna emkap RP. Emmanuel Sembiring, ketua tim Missale Romawi Karo, si rusur nge erwari-wari aku erdahin ras ia. Si erbahan “andiko” nina ukurku, sabap si enda kueteh kenca Youcat Karo enggo sangana icetak. Mbera-mbera pastor e banci “maklum” guna cetaken si pemena enda. Adi asa pengidahku alu litna pastor-pastor nemani kami bas teptep perjumpan pendahin, maka terbiten si pemena enda pe bebas nge idur “kesesatan”.

Ananta Bangun: “Uga penggejapenndu kenca Youcat iterjemahken ku cakap Karo ras ielaken ku tengah-tengah umat si ercakap Karo?”

Betlehem Ketaren: Meriah ukurku, sabap asa kuidah pe meriah ka ukur pastor-pastor bage pe pengurus DPPH si siwah paroki i kevikepan St. Yakobus Rasul Kabanjahe ngalo-ngalosa. Tupung isosialisasiken pe, minter nge teridah ketedehen atena ngarapken terbiten buku enda. Sanga ilaunching 19 Oktober si lewat, langsung nge ialo-alo alu ukur si erburak. Lit pastor paroki si mis igalarina alu lunas bagi si iban RP. Angelo Purba, OFMCap i paroki Seribudolok nari;  lit ka si ngataken maka “jatah” 100 buku perparoki minter nge kari keri, bagi si ikataken RP. Cypriano Barasa, OFMCap, pastor  Tigabinanga. I paroki Berastagi pe lancar nge sekretariat nehken buku e ku pengurus stasi-stasi.  Kuidah ka pe maka paroki Tiganderkket enggo isehkenna sen buku e lunas. Pastor Leo Joosten Ginting pe alu idahna fotona jadi cover sada bindu-na langsung tukurna dua, sada berena man pengurus. He he he…

Maka, adi kuakap enggo me paksana genduari ibanlah program pegiahken ngoge buku enda, subuk arah kevikepan St. Yakobus Rasul Kabanjahe bage pe arah paroki-paroki. Umpamana bas perayaan Minggu Misi , seh kal sikapna adi iban Kuiz kempak OMK alu referensi buku enda. Bage ka pe i paroki-paroki, banci ka iban program erban katekese gendek sope tah pe kenca perminggun i stasi-stasi nggunakan buku Youcat enda. Kuakap lanai lit alasenta maka langa lit bahanna.

Ananta Bangun: “Engkai maka Youcat Karo e penting isehken ku tengah-tengah umat si ercakap Karo?”

Betlehem Ketaren: Tangkas kap matanta ngidah, seh asa genduari i merari stasi i paroki-paroki si ercakap Karo, gelemen umat terjeng dua kitap ngenca, eme: Pustaka Sibadia ras Pujin man Dibata. Tentu saja e la cukup. Sigejapken pe maka kita irumah-rumahi alisen-aliren tertentu guna ngela-ngelaken bukuna. Bage pe pengurus awam arusna min itandaina kap produk-produk magisterium Gereja, selaku sumbul kuniteken Gereja seakatan Pustaka Sibadia ras Tradisi,  si gunana tuhu-tuhu penting jadi “benang merah” si ngubungken Tradisi ras Pustaka Sibadia e. Katekismus e me sada produk magisterium si terpenting ras pematang itandai umat ras terlebih Youcat enda iumputi pe alu referensi si penting dingen pe kena ku pusuhta.  Maka alu litna Youcat bas cakap Karo, enggo pelukah pengurus bas teptep terpukna ndahiken tugas Gereja ngajar (Kerygma).

Ananta: “Kai arapenndu bas wari si reh enda kerna kitap Youcat karo e?”

Betlehem Ketaren: Asa perkiranku 1000 buku e terjeng pemenan nge ngenca. Nginget maka lit ratusan ribu umat Katolik si make cakap Karo, maka situhuna perlu nge buku enda cetak ulang paling 1.000 istik Gereja pertambahen umat Katoli i KAM enda kalak Karo lit buena kurang lebih 1.000 kalak pertahunna. Adi man teptep penganten iarusken nukur Pustaka Sibadia, engkai maka man si ngaloken Sakramen Inisiasi la iarusken nukur Youcat Karo. Adi kin si perobahi ateta kai asil peniksiken pastor Dr. Herman Nainggolan, OFMCap subuk bas Sinode VI KAM bage pe bas Jubileum 75 Tahun Katolik i Taneh Karo, si nuriken maka meteruk denga kal pemeteh kekatolikenta, maka Youcat Karo enda me sada pulungen tawarna.

Ananta Bangun: “Lit tenahndu man si ngoge Menjemaat ras Ralinggungi kerna Youcat Karo?”

Terlebih man umat ras pengurus stasi-stasi ras paroki-paroki i Taneh Karo, mari dage ras-ras kita ningkatken pemeteh ras kiniteken katolik arah ras-ras kita ngoge bage pe ercakap-cakap kerna Youcat Karo.(Iterjemahken arah blog. Ananta Bangun ras iedit seperluna.)

Betlehem Ketaren

PENAGKUHEN 5 PASTOR KAPUSIN I SIANTAR: “JADILAH SI NGEPKEP JABU, TAPI ULA ERJABU!”

I lebe-lebe dua ribun umat, pastor, suster, bruder, frater, lima diakon kapusin enggo itangkuhken uskup Mgr. A.B. Sinaga jadi pastor bas tanggal 26 Januari 2018 i gereja Maria Lourdes, Jl. Marihat Siantar. I je, Mgr. (Em). A.G. Pius Datubara pe ikut ngarakken uskup dingen la ketadingen pe si natang layar-layar Gereja subuk i tingkat keuskupan bage pe paroki-paroki asal pastor-pastor si itangkuhken.

Si lima pastor kapusin si itangkuhken e emkap: RP. Menrad Rumapea (paroki asal: Palipi), RP. Poliaman Purba (paroki asal: Lubuk Pakam), RP. Gokmenteo Sitinjak (paroki asal: Onan Runggu), RP. Hotraja Purba (paroki asal: Seribudolok) ras RP. Jumperdinan Manik (paroki asal: Seribudolok).

Sinatang layar-layar Gereja bas paksa e makeken kasula mbentar si ermaga-magaken curak megara kundul i kawes ras kemuhen uskup, teridah ije: RP. Elias Sembiring, OFMCap, RP. Leo Sipahutar, OFMCap, RP. Stefanus Sihotang. OFMCap, RP. Nelson Sitanggang, OFMCap, RP. Angelo Purba, OFMCap, RP. Evan Pardede, OFMCap, RP. Mikael Manurung, OFMCap, RP. Oscar Tober Sinaga, OFMCap, RP. Herman Nainggolan, OFMCap, RP. RP. Benyamin Purba, OFMCap, RP. Damianus Gultom, ras sidebanna. Propinsial Kapusin RP. Kornelius Sipayung, OFMCap. jine pe ikut i je  nemani kalak e alu erkasula mbentar.

Lit pe 150-an pastor konselebran muat bagin bas acara e. I panti malim arah kawes teridah i je RP. Liberius Sihombing, OFMCap, RP. Antonius Siregar, OFMCap, RP. Donatus Marbun, OFMCap bage pe RP. Michael Hutabarat, OFMCap raduken pastor-pastor si deban. I arah kemuhen panti imam teridah i je RP. Leo Joosten, OFMCap, RP. Ignatius Simbolon OFMCap, RP. Cypriano Barasa, OFMCap, ras si debanna si la mungkin sada persada isenaken kami gelarna i jenda.

Anem pe sope seh jam empat karaben i kota Siantar ndabuh udan, si e la jadi alang abad bas kerehen umat si rulo. Alu erpayung ras deba ersongken uis tah pe jaket, alu ergiah-giah kerina bengket ku gereja ngiani ingan kundul subuk i teruh, i balkon bage pe i kursi-kursi i isediaken i teruh teratak si ngelewetti gereja. Tutus kal atena ngikuti acara terlebih pe rende arah pinpinen dirigen si tuhu-tuhu ngasup peburakken ukurna kerina.

Ibas kata penegunna, Mgr. alu tegas ngataken gelah min si lima pastor enda ula erleja-leja ngarak-ngarak ras ngepkep jabu gelah sempabu, tapi ula sempat erjabu!. Tole pe ikataken uskup, gelah banci tetap alu metunggung ndalanken Telupengkebet Kristus selaku nabi-guru, malim ras permakan, arus nge pastor-pastor kerina teptep wari erbahan misa subuk ras umat tah lang, ertoto segedang sada wari teptep wari, ras la banci lang katepen ngakuken dosa asangken umat. “Adi umat silanglangna sekali setahun arus ngakuken dosa, maka pastor-pastor arus katepen asangken umat e!”, nina uskup alu sora si megang.

Itambahken uskup ka pe katana man pastor si lima e bage pe man umat si pulung maka bas ngarak-ngarak dingen ngepkep jabu gelah sempabu e, pastor-pastor min petujuken jabu-jabu gelah jadi ingan si mehumur nandangi pendilon Tuhan jadi permakan-permakan bage pe serayan Gereja si deban. “Man bandu pe kerina jabu, metedehlah atendu maba anak-anakndu jumpa ras pastor, bage pe kam pastor bahanlah tetap waktundu jumpa ras jabu bage pe man anak-anak i tengah jabu Katolik, gelah alu pengeranandu, alu perbahanen-perbahanenndu terlebih pe alu kerehenndu mekatep ku jabu e, turah sura-sura anak-anak ngikuti dalan si enggo itetapkenndu idalanindu ngusih Tuhanta Jesus Kristus!” nina uskup ndungi cakapna.

Ibas tegunna ngerana, RP. Kornelius Sipayung, OFMCap. selaku Propinsial Kapusin ermomo kerna ingan tugas 5 pastor si mbaru e. Ikatakenna maka RP. Jumperdinan Manik OFMCap iutus ermisi i Keuskupan Jayapura, Papua; RP. Gokmenteo Sitinjak, OFMCap. iutus ermisi ku Wamena, Papua; RP. Hotraja Purba, OFMCap. ku paroki Airmolek Keuskupan Padang; RP. Poliaman Purba, OFMCap. iutus ku paroki Medan Timur; ras RP. Menrad Rumapea, OFMCap. iutus ku paroki St. Fransiskus Assisi Berastagi.

Kenca dung misa penangkuhen malim si lima e, kerina umat bage pe serayan Gereja si pulung iiahken pulung i ingan resepsi si enggo isikapken panitia. Ibahan i je kata-kata pengalo-ngalo bage pe man ras-ras. Ibas tegunna Ibu Yulia Sinurat i Pembimas Katolik Sumut nuriken keriahen ukurna nandangi penangkuhen e ras la lupa pe mere bekal pastor-pastor mbaru e ndalanken tugasna alu mere perlengkapen misa.

I sekelewet ingan pulung teridah i jah i je umat erterpuk-terpuk ngerana ras pastor tah suster, frater bage pe bruder. Tergejap maka meriah bualna.  Tangkas kal maka bas lakon enda ipakeken umat pe lako peburo atena tedeh subuk man pastor ras serayan Gereja si enggo pindah arah parokina nari, tah pe si itandaina arah erbage-bage kesempaten. Suasana perkade-kaden “kapusin” tergejap tuhu-tuhu.

Selamat ngelai man bandu pastor si lima si mbaru itangkuhken!

Riduan Ginting & Betlehem Ketaren

PEMASU-MASUN GEREJA ST. MONIKA STASI SERDANG ERDALAM ALU METUNGGUNG

Bas wari Minggu tanggal 4 Juni, Mgr. (Em) A.G. Pius Datubara iarakken  Vikep RP. Karolus Sembiring, OFMCap., pastor paroki Berastagi RP. Liberius Sihombing, OFMCap., bage pe RP. Mikael Hutabat, OFMCap. i Biara Kapusin Sapo Malem nari, enggo masu-masu ras ngeresmiken pemaken gereja St. Monika Stasi Serdang, paroki St. Fransiskus Assisi Beratagi.

Acara ibenai i gereja alu pengendesen kunci gereja arah tukang nari kempak pastor paroki ras pemulkan pintun si ilakoken porhanger Stasi Serang, Ingan br. Sembiring. Kenca si e uskup isampati serayan masu-masu altar, salib dingding, patung-patung, bage pe gedung gereja alu liturgi meriah si ikuti umat Stasi Serdang, donatur, tukang, enterem temue bage pe Bupati karo Terkelin Berahmana, SH alu keriahen ukur si mbages.

Kenca pemasu-masun ilakoken, acara iterusken i Jambur. Uskup Emeritus  ras serayanna berkat ndatasi motor pick-up iarakken mesdinar, pengurus Gereja bage pe umat ras temue kerina. Iarakken alep-alep “Alopa-lopa” motor erdalan manjar-anjar mentasi dalan kurang lebih 700 m dauhna ras ilebe-lebe jambur minter ka ialo-alo ka alu alep-alep “Alopa-lopa” arah umat sada paroki.

Mgr. (Em) A.G.Pius Datubara ibas bagin Nuri-nuri nangkasken maka “arus tetap ersada arihta dingen sipindo gegeh arah Kesah Sibadia guna pebelinken perpulungen i Stasi Serdang bage pe i sebelang-belang paroki Berastagi. Enggo sikap ras metunggung pajek gereja i kuta enda.  Enggo icidahken tukang bekasna erbahan bage pe icidahken donatur ukurna mehuli. Idatas kerina si e enggo ersada arih ras gegeh umat i stasi enda. Si enda kerina ula sisia-siaken, e maka tetaplah si pindo Kesah Sibadia lako negu-negu, ngarak-ngarak ras minpin kita kerina!”, nina alu sora si tangkas ras medolat.

Pastor paroki Berastagi RP. Liberius Sihombing, OFMCap. bas tegunna la ketadingen mereken telah-telah. “Tentu bas paroki, tah pe keuskupen asa pengidahku enda denga sada gereja si galang, mejile ras metunggung banci idungi alu paksa si gendek. Enem bulan ngenca dekahna enggo dung gerejanta enda. Si enda ncidahken maka pendahinndu kerina, bage pe pendahin tukang dem alu pasu-pasu ras pengarak-ngarak Tuhan. Si enda jadi peringet-ingeten man banta maka adi ersada arihta ras erpengendes kita, bagi tersurat bas Pustaka, labo lit si metahat bas Dibata!”, nina pastor e.

Ilebe-lebe 1.700 kalak si ndemi ras enterem ka kundul i luar jambur kuta Serdang Kec. Barusjahe e, Tangsi Barus, S.Pd. selaku Pelaksana DPPH bage pe Ketua Panitia Pembangunen gereja Serdang, nehken keriahen ukur bage pe pemindonna. “Meriah kal ukur kami, gereja enda banci dung sue ras rencana. Si enda labo bekas beluh kami tapi tentu erkiteken penampat Dibata man banta kerina. Terlebih man Bupati Karo, Berahmana mergana, tergejap kal man kami maka kam enggo mperdiateken pembangunen gereja enda mulai kin bena-benana nari pe. Anem bage, erkiteken pendahin tukang enggo dung tapi pertaktaken ras ia langa tembe, bas kesempaten enda mindo ka kami gelah isampatindu kami, bage pe kerina kam si nihamati kami”, nina Barus mergana e alu medale tapi pasti.

          Bas kata pengalo-ngalo temue, subuk Bupati Karo Terkelin Berahmana, SH ras rombongen, Dandim 0205  Karo Let.Kol (Inf.). Agustatius Sitepu, M.Si, Keluarga Simangunsong bage pe si la tersena kerina gelarna, ngataken keriahen ukurna kerina bage pe nehken penampatna tersitik-sitik  lako ndungi tembe-tembe ras tukang. Kenca si e ibahan ka pe lelang-lelang kehamaten bage pe lelang-lelang barang. Uskup (Em) A.G. Pius Datubara jine rempet tedis guna ngelelangken jam-na ras erkiteken si e tersampati ka panitia Rp. 25 jt. buena Asa pemegi Ralinggungi bas wari e pulung kerina penampat buena Rp. 172 jt.

           Perlumban kuiz, Vokal Group/Koor bage pe lumba Karya Tulis bas paska Perbapan se-paroki ibahan pe ngararakken pemasu-masun gereka St. Monika e. Perbapan teridah ersada arihna ras meriah kal ukurna ncidahken kinibeluhenna rende bage pe makeken perkakas musik. Bage pe bas kuiz ras Karya Tulis kerna Perbapan, icidahkenna ka maka tutus kal atena kerina ngikutisa. Bas momo i pendungi acara arah Juri nari: Bp. Mira Gintings, Nd. Mira br Tarigan, Marsel Tarigan, Frater-frater kapusin bage pe Betlehem Ketaren ras Udit Ginting,  ipebetehken maka juara 1 koor: Lingk. St. Petrus Berastagi, Juara 1 Vokal Group: Lingk. St. Andreas Berastagi, Juara 1 Kuiz: Stasi Merdeka, ras Juara 1 Karya Tulis: Ganevo Ginting Stasi Raya. (BK).

SOSIALISASI PRIORITAS PASTORAL KAM I KABANJAHE: “PELEBEKENLAH PENGEPKEPEN JABU”

BETLEHEM KETAREN

Sosialisasi Prioritas Pastoral man pastor-pastor, DPP ras Anggota Sinode i paroki-paroki sebelang kevikepan St. Yakobus Rasul Kabanjahe ras kevikepan St. Andreas Rasul Sidikalang ilakoken bas Kamis 8 Desember 2016 erketepaten ras Wari Raya Santa Maria Ikandung La Ternoda, i aula PPU SPM Kabanjahe.

Vikjen RP. Elias Sembiring, itemani OFMCap, RP. Martin Nule, SVD ras Jamalum Sinambela i keuskupen nari mabai runggun e, ngataken maka uskup enggo netapken empak tah pe fokus program pastoral ku tahun-tahun si reh enda erpalasken asil sinode VI ras visi misi KAM si arus idalanken ras-ras i kerina paroki.

“Arus kap sada perarihen kita kerina ndalanken kai si enggo itetapken ras metunggung kal adi sada pengodak kita ndalankenca. E maka meriah kal ukur kami kita banci pulung bagenda, enda sada tanda kininggitenta ndalanken pendahinta si enggo isikapken e”, nina RP. Elias Sembiring menai cakapna.

“Kai kin si enggo isikapken e? Kerina asil Sinode VI enggo iaturken jadi 5 target si ijadiken jadi tegun dahin teptep tahunna, emkap: Tahun 2017 Jabu si Ertoto; Tahun 2018 Jabu si Sempabu; Tahun 2019 Jabu si Ermediate ku Keteremen, Tahun 2020 Jabu si Kejuen ras Tahun 2021 Jabu Sumbul Pendilon.”, nina ka nerusken cakapna.

Target-target pertahunna e ipetangkas pastor ras teman-temanna sada persada, ras ikatakenna maka teptep pendahin e arus kap irancang make sukat-sukat target si arus terukur ras banci isiksiki.

“Bas tahun 2017, targetta ningkatken geluh ertoto bas Jabu Katolik. Arapenta 50% perbapan, 80% pernanden ras 100% anak-anak, singuda-nguda anak perana reh ku gereja bas wari Minggu ras ku perpulungen, 100% jabu Katolik ngoge Pustaka Sibadia dua kali seminggu ras 100% ka umat Katolik erpuasa ras erpantang bas paksa si itentukan, ...”nina Jamalum bas tegunna.

Megi-megi target-target si arus itetapken ras ikejar, melala anggota runggu bas paksa sungkun-jabap nuriken kesuliten akapna. Tapi alu manjar-anjar ikataken si mabai runggun e teluna, uga perluna target si arus ikejar, ras kininggiten ngejarsa nge si pentingna. Penuriken kalak e, mabai alu manjar-anajar kerina si runggu dungna banci ngalokensa.

Bas perjumpan e pe, ibahan pe tugas teptep paroki ncubaken erbahan program si erpalasken prioritas pastoral KAM tahun 2017. Teridah teptep utusen paroki ertutus ate ndalankenca, gia melala ka si metahat niakapna erbahansa ras m,indo penampat arah si mabai runggun nari.

Ikataken RP. Elias Sembiring pe maka bas 5 tahun si reh enda, kerna Jabu me arus ipelebeken.

“Bagi si enggo sicakapken ndai kerna, target-target bas lima tahun enda la banci lang maka kursus-kursus, katakese tah pe lakon-lakon si deban, kerna jabu si arus sipelebeken ras ipebueken siprogramken i keuskupenta enda. Subuk i paroki, stasi bage pe lingkungen perlu buen erbahan program kerna Jabu. Seksi Keluarga me si jadi ikuten kerina seksi. Seksi liturgi ngaturken pertoton jabu, seksi katakese nuriken kai siarus ieteh jabu rikutken tegunna ras target tahunen e, bage me seterusna. Adi bage si bahan maka tuhu-tuhu erkesehen ku umat buah-buah Sinode e,  ras seh me tujunna Jabu e selaku Gereja Rumah Tangga si pantek paguh ras ndauh idur percuban-percuban bas jaman si genduari nari”, nina pastor Sembiring mergana e.

RP Karolus Sembiring, OFMCap ngiahken gelah teptep paroki bas kevikepanna banci ndungi erbahan program pendahina gelah ras-ras ilaporken ku keuskupen selambat-lambatna bas tanggal 31 Januari 2017, ras bage ka pe ibahan RP Ipong Suponidi, O.Carm man paroki-paroki i kevikepan Sidikalang. Kerina pastor paroki si reh erpengue ras ngataken banci erbahan program paroki dung bas tanggal si itetapken. (BK).